دلۆڤان حەسەن

شێروانێ سەرگەلی وەڵاتیەکێ دەڤەرا نهێلێ یە ئاگرەکێ مەزن بەربوبوو نێزیک گوندێ وان مە وەک گاڤ تەلەفۆن بۆ کر دگەل ئاخڤتنا دگەل مە بۆ هەوار هەوارا وان،پاش گۆت برا چ نەمابوو هەڤالەکێ مە بمینیتە د ناڤ ئاگری دا، من گۆتێ باوەرم ئاگر یێ مەزنە چەند تیم دگەل وە هەنە کی د هەوارا هەوە هاتیە هوون بزاڤا ڤەمراندنا ئاگری دکەن، گۆت:بخودێ ئەم بتنێ خەلکێ گوندی نە ب هەژان و ماتۆرەکێ ئاگرڤەمراندنێ یێ کو "محەمەد مەحسن" دایەف مە چەندین دەمژمێرن بێی راوستیان بزاڤا ڤەمراندنێ دکەین!

گۆتژی ئاگر نێزیکی مالان بوویە ئەم گەلەک ماندی بووینە لێ بخودێ ناهێینە ڤە تا ب تەمامی نە ڤەمرینین.

ئاگر بەروبوو نێزیکی گوندێ پیرۆزانا ل دەڤەرا بەرێگارەی  دیسان وەک گاڤ چووین رۆمال بکەین،هندەک سنێلە دگەل مە هاتبوونە جهێ ئاگربەربوویێ ئاگر د ڤەمراند، ئاڤا ڤەخوارنێ دگەل نەمابوو  ژ دویکێلێ ژی رەش بوبوون هەڤالان گۆتێ رۆژ ئاڤابوو دابچینە مال مە ئاگر ژی کۆنترۆلکریە، وان سنێلا گۆت دێ ل دۆر جهێ ئاگری هەمیێ زڤڕین دا پشت راست ببین دوبارە ڤێڕا ناچیتەڤە مخابنە گەلەک گوهیشک و کەزان و دار مازی و گرسک یێ ل ڤارا هندی ئێک نە سۆژیت باشترە.

دەڤەرا ئامێدیێ کو ئێک ژ چڕ و پڕترین دەڤەران بوو ژلایێ هەبوونا ب دەهان جۆرێن دارێن بەری و نە یێن بەری، لێ دارستانێن ڤێ دەڤەرێ ل بەر قڕکرنێ نە.

بتنێ ل دەڤەرا نهێلێ پتر ژ سێچارێکێن دارستانێن وێ هاتنە سۆتن ژبلی خەلکێ وێ دەڤەرێ کو ب کەدا ملێن خۆ ئاگر د ڤەمراندن و هندەک جارێن کێم هەڤکاریا وان دهاتە کرن،

مە "ژینگەهـدوست"ل دهۆکێ نەدیتن د هەوارا دارستانێن ڤێ دەڤەرێ بهێن، یان ژی هەما ل جادەیەکێ ژی خرڤەبوونەکا نەرازیبوونێ بکەن،ئەگەر نەرازیبوونەک هەبیت ژی د ئاست وێ قڕکرنێ دا نەبوویە یا کو د دەرحەق ژینگەها ڤێ دەڤەرێ دا دهێتە کرن!

ئەڤە سۆتن ژبلی یێن کو ل دەڤەرێن نێروەو رێکان، دوسکی ژووری و بەرواری ژووریان هاتینە بڕین و تالانکرن.

ئاگر بەربوو گۆرستانا مەزارێ شێخ ئیسلام ل دێرەشا کەڤن ئەم دو پەیامنێر یێن دو دەزگەهان دگەل وێنەگرەکی دگەل دو ژ وەڵاتیێن گوندێ دێرەشێ چووین مە وەک گاڤ راستەوخۆیەک ل وێرێ کر کو بۆ رایا گشتی دیاربکەین ئاگر ب ڤی جهی ڤەیە ژبلی کو مەزارەکە، ب دەهان دار د ناڤدانە کو ژیێ وان پترە ژ 150ساڵان، هندەک جامێرا دگۆت "ئەفەندی شوینا تو وێنەدکەی ئاگری ڤەمرینە"ب مایکێ یان هەتا هەژەک ژی د دەست من دا بیت چ ل ئاگرێ دارستانەکێ بکەم!

ئەم ژی بڕینا داران ل ناڤا جادێن دهۆکێ ب کارەکێ نە یێ دروست دبینین، دەستخۆشیێ ژی ل خۆدانێن دەنگێن نەرازی یێن ددەرحەق ڤی کاری دا دکەین.لێ ژ ژینگەهـ دوستێن دهۆکێ دخازین خەما دارستانێن ئامێدیێ ژی بخۆن ئامێدیێ ژی هەر دهۆکە.

ب گشتی ئەگەر ئەڤا د دەرحەق رەزێن وەڵاتیان و دارستانێن دەڤەرا ئامێدیێ دا هاتیە کرن و دهێتە کرن ل وەڵاتەکی بایە کو هشیاریا تاکی ، ئنتیمایا نیشتیمانی،هەستا نەتەوایەتی، د گۆپیتکا بلندیێ دابایە ئەگەر هەر چ نەبا دا رایەکا گشتی یا نەرازیبوونێ دەنگێ خۆ ب سەر بێدەنگیا هەمی جیهانێ ئێخیت.ل سەر ڤێ بێدەنگیێ ئەم هەمی سووچدارین.