گاڤ – تایبه‌ت

رێڤه‌به‌رێ به‌لاڤكرنا گازێ ل پارێزگه‌ها دهۆكێ بۆ گاڤ راگه‌هاند، بلا وه‌لاتى خۆ ل هیڤیا گازا به‌غدا نه‌گرن ئه‌و گاز بۆ ده‌ڤه‌رێن چیایى یه‌ و داخواز ژ وەلاتیان کر: ئه‌و گازا نوكه‌ دهێته‌ به‌لاڤكرن، وه‌ربگرن.

محسن تاها، رێڤه‌به‌رێ به‌لاڤكرنا نه‌فت و كانزایان ل پارێزگه‌ها دهۆكێ ب رێکا گاڤ راگه‌هاند: ئه‌و گازا حكومه‌تا ئیراقێ به‌حس ژێ دكه‌ت كو دێ ب 50 هزار دیناران ل سه‌ر وه‌لاتیان هێته‌ به‌لاڤكرن، دێ بۆ ده‌ڤه‌رێن چیایى بیت و داخواز ژ وه‌لاتیێن سه‌نته‌رێ پارێزگه‌ها دهۆكێ كر گازا نوكه‌ دهێته‌ به‌لاڤكرن، وه‌ربگرن.

هه‌روه‌سا دیاركر ژى: به‌هرا دهۆكێ ژ وێ گازێ 7 ملیۆین و 900 هزار لترن و ئه‌و گاز دێ ب 40 هزار خیزانێن ده‌ڤه‌رین چیایى هێته‌ دان و تێرا هه‌موو پارێزگه‌ها دهۆكێ ناكه‌ت.

هه‌روه‌سا گۆت: زێده‌بارى وان پێنجى هزار دیناران، دێ كریا دو كۆمپانیێن ڤه‌گوهاستنا وێ ژ بێجى بۆ هه‌رێمێ و به‌لاڤكرنا وێ ل سه‌ر وه‌لاتیان هه‌بیت و دێ پا‌رەیێ كۆبوونێ ژى جودا هێته‌ وه‌رگرتن.