ئه‌مریكا و هه‌ڤپه‌یمانێن خۆ، ل گەل حووسیان ل ده‌ریا سۆر د شه‌ڕه‌كێ دژوار دانه
بەلاڤ بکە
ئه‌مریكا و هه‌ڤپه‌یمانێن خۆ هێرشه‌ك ل سه‌ر حووسیێن یه‌مه‌نێ كر
ئه‌مریكا و هه‌ڤپه‌یمانێن خۆ هێرشه‌كا دژوار ل سه‌ر بنگه‌هـ و ناڤه‌ندێن حووسیان ل یه‌مه‌نێ كر و ده‌هان جهـێن وان ل ناڤا باژێڕێن یه‌مه‌نێ كرنه ئارمانج.
ئه‌ڤرۆ سپێدێ جۆ بادین، سه‌رۆكێ ئه‌مریكا راگه‌هاند، ل سه‌ر فه‌رمانا وى هێزێن ئه‌مریكا و بریتانیا ب هه‌ڤكاریا ئوسترالیا، به‌حرێن، كه‌نه‌دا، هۆله‌ندا هێرشه‌كا سه‌ركه‌فتى ل سه‌ر هنده‌ك بنگه‌هـ و جهێن حووسیان ل یه‌مه‌نێ كریه.
گۆتژى، ئه‌و دو دل نابیت ل سه‌ر فه‌رمانێن سه‌ربازى ل دژى حووسیان ئه‌گه‌ر پێدڤى بكه‌ت و ل هه‌رده‌مى سوپا د ئاماده‌باشیێ دایه.
پشتى هێرشێ میدیایێن ئه‌مریكا به‌لاڤكر، هێرش ب رێكا فڕۆكه و كه‌شتیێن شه‌ڕى هاتینه كرن و د هێرشان دا چه‌ندین باژێڕێن یه‌مه‌نێ بووینه ئارمانج كو حووسی تێدا بالا ده‌ستن.
عه‌بدولمه‌لك حووسى، سه‌ركرده‌یێ حووسیێن یه‌مه‌نێ راگه‌هاند، چ هێرشێن ئه‌مریكا بێ به‌رسڤ نابن و ئه‌و دو دل نابن ژ هه‌ر كاره‌كى ئه‌و بشێن بكه‌ن.
ئه‌مریكا: هیرشا ئه‌مریكا و هه‌ڤپه‌یمانێن وێ ل سه‌ر حووسیان بۆ كێمكرنا شیانێن وانه
سوپایێ ئه‌مریكا راگه‌هاند، هێرشا ئه‌مریكا و هه‌ڤپه‌یمانێن وێ بۆ سه‌ر حووسیان ل یه‌مه‌نێ بۆ كیمكرنا شیانێن حووسیانه بۆ به‌رده‌وامیدان ب هێرشێن ل سه‌ر كه‌شتیێن بازرگانى.
ئه‌ڤرۆ ئه‌ینیێ 12-1-2024ێ مایكل كورێلا، فه‌رمانده‌یێ فه‌رمانده‌یا ناڤه‌ندى یا سوپایێ ئه‌مریكا سێنتكۆم گۆت: هێزێن فه‌رمانده‌یا ناڤه‌ندى یا سوپایێ ئه‌مریاك ب هه‌ڤكارى ل گه‌ل سوپایێ بریتایا ب پشته‌ڤانیا ئوسترالیا، كه‌نه‌دا، هۆله‌ندا و به‌حرێن هێرشه‌كا هه‌ڤپشك بۆ سه‌ر بنگه‌هێن حووسیان ل یه‌مه‌نێ كر.
سێنتكۆم دیاردكه‌ت، هێرش ل ده‌مژمێر 2:30 خۆله‌كى ئه‌ڤرۆ سپێدێ ئه‌ینیێ ب ده‌ما سه‌نعا پایته‌ختێ یه‌مه‌نێ هاتیه‌كرن.
ل گۆڕه‌یى سێنتكۆمێ سیسته‌مێن رادارێ و به‌رگریێ هاتینه بكارئینان و كۆگه‌هـ و جهێن هاڤێتنا مووشه‌كێن حووسیان بووینه ئارمانج.
كورێلایى ئاشكراكر، ئه‌مریكا چه‌كدارێن حووسى و سپۆنسه‌رێن وان ئیرانیان ب به‌رپرسیار دزانین ژ هێرشێن نه‌قانووى و بێ بنه‌ما ل سه‌ر كه‌شتیێن نێڤده‌وله‌تى كو كارتێكرن ل 55 وه‌لاتان كریه
سه‌رۆكوه‌زیرێن بریتانیا: هێرشا ل سه‌ر حووسیان به‌ره‌ڤانیكرنه ژ كه‌شتیێن جیهانى
سه‌رۆكوه‌زیرێن بریتانیا دیاردكه‌ت، هێرشا ئه‌مریكا و بریتانیا ل دژى بنگه‌هـ و باره‌گه‌هێن حووسیان ل یه‌مه‌نێ پێدڤى و گونجایى بوو.
رێشى سۆناك، سه‌رۆكوه‌زیرێن بریتانیا دیاردكه‌ت، زێده‌بارى هۆشداریێن به‌رده‌وام یێن كۆمه‌لگه‌ها نێڤده‌وله‌تى، حووسى ل سه‌ر هێرشێن خۆ ل ده‌ریا سۆر به‌رده‌وام بوون، هه‌ر ژ به‌ر ڤێ یه‌كێ ژى ب كریارێن سنۆردار و پێدڤى و گونجایى وه‌ك به‌ره‌ڤانیكرن ژ خۆ ملبملێ ئه‌مریكا هێرش هاتینه كرن.
سۆناك دیاردكه‌ت، ئارمانج ژى ژێ لاوازكرنا شیانێن سه‌ربازى یێن حوسیانه بۆ پارستنا هاتنوچوونا كه‌شتیێن جیهانى.
سه‌رۆكوه‌زیرێن بریتانیا هێرشێن حووسیان ب نه‌به‌رپرسیارانه و نه‌سه‌قامگیر ناڤكرن و گۆت: هیرشێن حووسییان بهایێن تشتان گران كرینه و نابیت ئه‌ڤ یه‌كه به‌رده‌وام بیت و بریتانیا هه‌رده‌م به‌ره‌ڤانى ژ ئازادیا هاتنوچوونا ده‌ریایى و بازرگانى كریه.
حووسیێن یه‌مه‌نێ: یا مه پێ چێبیت ل دژى ئه‌مریكا دێ كه‌ین.
سه‌ركرده‌یێ حووسیێن یه‌مه‌نێ راگه‌هاند، ئه‌و دو دل نابن ل سه‌ر هه‌ر كاره‌كى وان پێ چێبیت و راگه‌هاند، هه‌ر ئالیه‌كێ وان بكه‌ته ئارمانج دێ مه‌ترسیێ ئێخیته سه‌ر كه‌شتیێن بازرگانى.
ئه‌ڤرۆ سپێدێ 12-1-2024ێ عه‌بدولمه‌لك حووسى، سه‌ركرده‌یێ حووسیێن یه‌مه‌نێ د تۆماره‌كا ڤیدیۆیى دا گۆت: چ هێرشه‌كا ئه‌مریكا بی به‌رسڤ نابیت و راگه‌هاند، ئه‌و دو دل نابن ژ هه‌ر كاره‌كى وان پێ چێبیت.
عه‌بدولمه‌لك حووسى، ئاماژه دا به‌رسڤدانا هێرشێن ئه‌مریكا و گۆت: هێرشین ئه‌مریكا ل ئاست هێرشین حووسیان نابن.
هێرشێن ئه‌مریكا ل سه‌ر حووسیان بنپێكاریه‌كا قانوونى یا نیڤده‌وله‌تى یه.
وه‌زاره‌تا ده‌رڤه یا ئیرانێ راگه‌هاند، هێرشێن ئه‌مریكا و بریتانیا ل سه‌ر حووسیان بنپێكارییه‌كا قانوونى یا نێڤده‌وله‌تى یه.
ئه‌ڤرۆ ئه‌ینیێ 12-1-2024ێ ناسر كه‌نعانى، په‌یڤدارێ وه‌زاره‌تا ده‌رڤه یا ئه‌مریكا راگه‌هاند، وه‌لاتێ وى ب توندى هێرشێن ئه‌مریكا و بریتانیا ل سه‌ر حووسیان ل یه‌مه‌نێ و هنده‌ك باژێڕێن وێ شه‌رمزار دكه‌ت و راگه‌هاند، ئه‌و هێرش نه‌دادپه‌روه‌رانه و دژى قانوونێن نێڤده‌وله‌تى یه.
ئه‌ڤرۆ سپێدێ ئه‌مریكا و هه‌ڤپه‌یمانێن خۆ ب دژوارى بنگه‌هـ و باره‌گه‌هێن حووسیان كرنه ئارمانج، هه‌ر هه‌موو گرۆپێن سه‌ر ب ئیرانێ ڤه ل یه‌مه‌ن و ئیراقێ و هه‌موو ناوچێ راگه‌هاندینه ئه‌و بێ به‌رسڤ نامینن.
سعودیێ دلگرانیا خۆ هه‌مبه‌رى هێرشێن سه‌ر ده‌ریا سۆر دیاركر.
سعوودیێ ب دلگرانى ته‌ماشه‌یى هیرشین ل سه‌ر ده‌ریایا سۆر كریه و دیاردكه‌ت، ل سه‌ر خۆبن و خۆ دووركرن ژ هه‌ر ئالۆزیه‌كێ دێ ره‌وشێ به‌ر ب باشتر به‌ت.
وه‌زاره‌تا ده‌رڤه یا سعوودیێ راگه‌هاند، گرنگه پاریزگارى ژ ئاسایش و ئارامیا ناوچه‌یا ده‌ریا سۆر بهێته‌كرن كو ب ئازادانه كه‌شتیێن بازرگانى هاتنوچوونێ لێ بكه‌ن و ئه‌و ب رێكه‌كا نێڤده‌وله‌تى ناڤكر و دیاركر، ئه‌و شه‌ڕ دێ كارتێكرنێ ل هه‌موو جیهانێ كه‌ت.
هه‌روه‌سا داخوازكر هه‌ر ئالیه‌ك ل سه‌ر خۆ بیت بۆ وێ یه‌كێ ره‌وش زێده‌تر ئالۆز نه‌بیت.
