فرۆشتنا لاپتۆپان د سالا بۆرى دا كێمبوویه
گاڤ
فرۆشتنا لاپتۆپ و دێسكتۆپێن كهسۆكى د سالا بۆرى 2023 دا ب رێژهیا 9% كێمبوویه پشتى كو د سهردهمێ بهلاڤبوونا پهژیكا كۆرۆنایێ دا فرۆشتنا وان زێدهبووى.
كۆمپانیا IDC یا تایبهتمهند ب لێكۆلینێن بازارى راگههاند "فرۆشتنا كۆمپیۆتهرێن كهسۆكى د سالا 2023 دا ب رێژهیا 9% كێمبوویه".
وێ كۆمپانیێ ئهگهرێن كێمبوونا فرۆشتنا كۆمپیۆتهر و لاپتۆپێن كهسۆكى ژ بۆ بلندبوونا رێژهیێن ههلئاوسانێ و كێمكرنا گهلهك ژ كۆمپانیان بۆ بودجهیێن خۆ ڤهگهڕاند.
ل گهل كێمبوونا فرۆشتێ ل سهر ئاستهكێ سالانه، وێ كۆمپانیێ ئاماژه ب وێ چهندێ كریه "د ناڤهراستا سالا 2023 و د چارێكا چارێ یا وێ سالێ دا فرۆشتن بهرهڤ سهقامگیریێ ڤه چوو".
ل گۆرهى پێشبینیێن IDC؛ دهێته چاڤهرێكرن بلندبوونا رێژهیا فرۆشتنێ یا ل چارێكا چارێ یا سالا 2023 هاتیه تۆماركرن بۆ ئهڤ ساله 2024 ژى بهردهوام بیت.
راپۆرتێن IDC خۆیا دكهن كو د چارێكا چارێ یا سالا بۆرى 2023 دا لاپتۆپ و كۆمپیۆتهرێن Dell ژ ههمییان پتر هاتینه فرۆشتن و ل دویڤ دا HP و لینوڤۆ و NEC و ئاسۆس هاتن.