گاڤ

سه‌رۆك و سه‌رۆكوه‌زیرێن به‌رێ یێن پتر ژ 50 وه‌لاتان و ژماره‌یه‌كا كه‌سایه‌تێن ناڤدار گازییه‌ك ئاراسته‌ى رێكخراوا ساخله‌میێ یا جیهانى WHO ژ بۆ رێگریێ ل په‌تایێن پاشه‌رۆژێ كرن.

پشتى به‌لاڤبوونا په‌ژیكا كۆرۆنایێ، ئه‌ڤ ده‌ستپێشخه‌رییه‌ هاتییه‌ هه‌بوونێ و مه‌ره‌م ژێ گرتنه‌به‌را رێكارێن پێدڤییه‌ ژ بۆ رێگریێ ل به‌لاڤبوونا په‌تایان ل پاشه‌رۆژێ.

دهێته‌ چاڤه‌رێكرن د ڤێ حه‌فتیێ و حه‌فتییا بهێت دا ل جنێڤ دانوستاندن ل سه‌ر ڤى مژارى بهێنه‌ كرن ژ بۆ گه‌هشتنێ ب زه‌مینه‌یه‌كا هه‌ڤپشك ل دۆر ده‌قه‌كێ هه‌ڤپشك به‌رى ژڤانێ دویماهیێ ل گۆلانا 2024.

ئه‌و كه‌سێن ئیمزا ل سه‌ر وێ گازیێ كرین دیار دكه‌ن "گه‌هشتن ب رێككه‌فتنه‌كێ ل دۆر په‌ژیكه‌كێ بۆ پاراستنا پاشه‌رۆژا مه‌ یا ب كۆم تشته‌كێ گرنگه‌".

ئاماژه‌ ب وێ چه‌ندێ ژى كرینه‌ "ب تنێ جارنامه‌یه‌كا جیهانى یا ب هێز ل دژى په‌ژیكان د شیان دایه‌ نڤشێن بهێت بپارێزیت دا كو قه‌یرانه‌كا وه‌كى كۆڤید-19 روینه‌ده‌ت ئه‌وا بوویه‌ ئه‌گه‌رێ گیانژده‌ستدانا ب ملیۆنان كه‌سان و وێرانبوونه‌كا جڤاكى و ئابوورى یا به‌رفره‌هـ و ب تایبه‌ت ژ به‌ر نه‌بوونا هه‌ڤكارییه‌كا نێڤده‌وله‌تى یا پێدڤى".

ئيمزاكه‌ران دوپاتى ل سه‌ر گرنگییا خۆبه‌رهه‌ڤكرنێ بۆ هه‌ر په‌ژیكه‌كێ ل پاشه‌رۆژێ كرن.