لێكۆلینه‌ك: شرینكه‌رێن ده‌ستكرد زیانێ دگه‌هیننه ساخله‌مییا رویڤیكان
بەلاڤ بکە
گاڤ
لێكۆلینه‌كا ساخله‌مییێ یا نوى ئاشكرا كریه؛ شرینكه‌رێن ده‌ستكرد زیانێن ساخله‌مییێ هه‌نه ژ وان ژى زیانێن دگه‌هیننه رویڤیكان.
لێكۆلینه‌كا نوى یا د كۆڤارا Frontiers in Nutrition دا به‌لاڤبووى ئاماژه دایه وێ چه‌ندێ "چه‌ند قۆرچێن كێم ژ شرینكه‌رێ ده‌ستكرد یێ ب ناڤێ Neotame ئه‌وێ ژ ئه‌سپارتامێ دهێته به‌رهه‌مئینان، زیانێ دگه‌هینیته رویڤیكان و دبیته ئه‌گه‌رێ هه‌ودانان، به‌رهنگارییا ئه‌نسۆلینێ و هه‌ودانێن خوینێ یێن مه‌ترسیدار".
د. هاڤۆڤى چیچجه‌ر لێكۆله‌ر ژ زانكۆیا ئه‌نگلیا روسكین ل بریتانیا دبێژیت "شرینكه‌رێن ده‌ستكرد زیانێ دگه‌هیننه دیوارێ رویڤیكان زێده‌بارى گه‌هاندنا زیانان ب به‌كتریایا باش یا دناڤ رویڤیكان دا".
ئێك ژ شرینكه‌رێن ده‌ستكرد ب ناڤێ Neotame یه كو ل سالا 2002 رازیبوون ل سه‌ر بكارئینانا وێ د گه‌له‌ك خوارنان دا ژ لایێ رێڤه‌به‌رییا خۆراك و ده‌رمانان یا ئه‌مریكى ڤه هاتبوو دان، لێ لێكۆلینێ ئاشكرا كریه "ره‌نگه ئه‌و شرینكه‌ره ب گه‌له‌ك رێكان زیانێ بگه‌هینیته كۆئه‌ندامێ هه‌رسكرنێ".
ژ زیانێن شرینكه‌رێ ده‌ستكرد یێ ب ناڤێ Neotame بۆ رویڤیكان ئه‌وه دبیته ئه‌گه‌رێ مرنا خانه‌یێن هاریكار بۆ هه‌لمژینا پێكهاته‌یێن خۆراكى زێده‌بارى ژناڤبرنا به‌كتریایا باش یا د رویڤیكان دا كو بۆ هه‌رسكرنێ یا پێدڤییه.
ئاژانسا لێكۆلینێن نێڤده‌وله‌تى یا گرێداى رێكخراوا ساخله‌مییێ یا جیهانى، ئه‌سپارتام وه‌سا پۆلینكریه كو "ره‌نگه پێكهاته‌یه‌ك بیت ببیته ئه‌گه‌رێ په‌نجه‌شێرێ بۆ مرۆڤان".
