سێ ژێده‌ر بۆ رۆیته‌رز: دوباره ده‌ستپێكرنا هنارده‌كرنا په‌ترۆلا كوردستانێ نه د خشته‌یێ كارى یێ ئیراقێ دایه
بەلاڤ بکە
گاڤ
سێ ژێده‌ر بۆ ئاژانسا رۆیته‌رز رادگه‌هینن؛ دوباره ده‌ستپێكرنا هنارده‌كرنا په‌ترۆلا كوردستانێ نه د خشته‌یێ كارى یێ ئیراقێ دایه و ئاسته‌نگێن یاسایى و دارایى هه‌مبه‌ر دوباره هنارده‌كرنێ هه‌نه.
به‌رى ساله‌كێ ژ نوكه و هه‌ر ژ 25/3/2023 هنارده‌كرنا په‌ترۆلا كوردستانێ بۆ ده‌رڤه ب رێكا به‌نده‌رێ جیهان یێ توركى پشتى بڕیارا ده‌سته‌یا ناڤبژیڤانیێ یا گرێداى ژوورا بازرگانى یا جیهانى ل پاریس راوه‌ستیایه، هه‌روه‌سا ده‌سته‌یێ ل سه‌ر توركیا سه‌پاند بوو 1.5 ملیار دۆلاران وه‌ك قه‌ره‌بۆ بده‌ته ئیراقێ ژ به‌ر هنارده‌كرنا په‌ترۆلا كوردستانێ ب رێكا توركیا ژ سالا 2014 هه‌تا 2018، سه‌ره‌راى رێككه‌فتنا حكومه‌تا هه‌رێمێ و ئیراقێ ل ده‌ستپێكا نیسانا سالا بۆرى ل سه‌ر هنارده‌كرنا په‌ترۆلا كوردستانێ ب رێكا سومۆ و جێگیركرنا ڤێ چه‌ندێ د یاسایا بودجه‌یا گشتى یا ئیراقێ دا، لێ هنارده‌كرن هێشتا ده‌ستپێنه‌كریه.
ل گۆره‌ى ئه‌پیكۆر، راوه‌ستیانا هنارده‌كرنا په‌ترۆلا كوردستانێ ب رێكا توركیا زیانێن ب نزیكى 11 ملیار دۆلاران گه‌هاندینه ئیراقێ.
ژێده‌ره‌كێ بۆ رۆیته‌رز راگه‌هاند "د نوكه دا گه‌نگه‌شه‌یا دوباره هنارده‌كرنا په‌ترۆلێ ناهێته كرن".
هه‌روه‌سا دو ژێده‌رێن دى بۆ رۆیته‌رز دیاركرن "هه‌ڤده‌م ل گه‌ل كێمكرنا ئیراقێ بۆ به‌رهه‌مئینانا په‌ترۆلێ ل گۆره‌ى رێككه‌فتنا ئوپێك پله‌س، دوباره ده‌ستپێكرنا هنارده‌كرنا په‌ترۆلا كوردستانێ نه د خشته‌یێ كارى دایه".
