گاڤ

بهایێن په‌ترۆلێ د بازارێن جیهانى دا جاره‌كا دى بلند بوون و بهایێ به‌رمیله‌كێ برێنت ئه‌ڤرۆ گه‌هشته‌ نزیكى 90 دۆلاران.

ژ به‌ر كێمبوونا په‌ترۆلا عومباركرى ل ئه‌مریكا و ئالۆزیێن رۆژهه‌لاتا ناڤین، بهایێن په‌ترۆلێ د ڤێ حه‌فتییێ دا ب رێژه‌یا 2% بلندبووینه‌ و بهایێ به‌رمیله‌كێ برێنت ئه‌ڤرۆ ئه‌ینییێ نزیكى 90 دۆلاران بوو‌.

بۆ ده‌مێ دو حه‌فتییان بوو بهایێن په‌ترۆلێ د نزمبوونێ دا بوون، ئه‌ڤرۆ بهایێن په‌ترۆلێ بلندبوون و دێ ئه‌ڤ حه‌فتییه‌ ل گه‌ل بلندبوونا بهایان ب دویماهیك هێت.

ئاژانسا رۆیته‌رز به‌لاڤكریه‌؛ بلندبوونا بهایێن په‌ترۆلێ هات پشتى به‌رپرسه‌كێ ئه‌مریكى یێ مه‌زن گه‌شبینییا خۆ ل دۆر گه‌شه‌پێدانا ئابوورى دیاركرى زێده‌بارى نیگه‌رانییێن ل دۆر كێمبوونا به‌رهه‌مئینانا په‌ترۆلێ ل رۆژهه‌لاتا ناڤین ژ به‌ر ئالۆزیێن ل ده‌ڤه‌رێ.

بهایێ په‌ترۆلا برێنت ئه‌ڤرۆ ب 47 سه‌نتان و ب رێژه‌یا 0.5% بلندبوو و بهایێ به‌رمیله‌كێ برێنت گه‌هشته‌ 89.48 دۆلاران.

هه‌ڤده‌م بهایێ به‌رمیله‌كێ خاڤا رۆژئاڤایێ تێكساس یا ناڤنجى یا ئه‌مریكى WTI ژى ب 44 سه‌نتان و ب رێژه‌یا 0.5% بلندبوو و بهایێ به‌رمیله‌كێ گه‌هشته‌ 84.01 دۆلاران.