گاڤ

رۆژنامه‌یه‌كا ئسپانى ئاشكرا كریه‌؛ ئێك ژ یانه‌یێن سعوودى یا به‌رهه‌ڤه‌ سالانه‌ مووچه‌یه‌كێ پتر ژ 100 ملیۆن یۆرۆیان بده‌ته‌ رۆبێرت لێڤاندۆڤسكى هێرشبه‌رێ به‌رشلۆنا ئه‌گه‌ر رازى ببیت یاریێ بۆ وێ یانه‌یێ بكه‌ت.

رۆژنامه‌یا موندۆ دێپۆرتیڤۆ ئاشكرا كریه‌؛ لێڤاندۆڤسكى یێ 35 سالى ئه‌و یاریكه‌ره‌ یێ پترین داخوازى ل سه‌ر هه‌ى ژ لایێ یانه‌یێن سعوودى ڤه‌.

دیار ژى كریه‌ "پشتى بزاڤه‌كا سه‌رنه‌كه‌فتى ل هاڤینا بۆرى، تا نوكه‌ ئێك ژ هیڤیێن یانه‌یێن خۆلا سعوودیه‌ ئه‌وه‌ یاریكه‌ره‌كێ ب شیان یێ وه‌كى لێڤاندۆڤسكى ل خۆلا سعوودیه‌ یاریێ بكه‌ت".

وى ژێده‌رى ناڤێ وێ تیما سعوودى یا بزاڤێن ڤه‌گوهاستنا لێڤاندۆڤسكى بۆ دناڤ رێزێن خۆ دا دكه‌ت ئاشكرا نه‌كریه‌ لێ ئاماژه‌ ب وێ چه‌ندێ كریه‌ "ئه‌و یانه‌یه‌ یا به‌رهه‌ڤه‌ ئۆفه‌را مووچه‌یێ سالانه‌ یێ پتر ژ 100 ملیۆن یۆرۆیان پێشكێشى لێڤاندۆڤسكى بكه‌ت".

لێ وێ رۆژنامه‌یێ ژ هنده‌ك كه‌سێن نزیكى لێڤاندۆڤسكى ڤه‌گوهاستیه‌ كو "هێرشبه‌رێ پۆله‌ندى هزر د هێلانا رێزێن به‌رشلۆنا دا ناكه‌ت كو گرێبه‌ستا وى ل گه‌ل یانه‌یێ هه‌تا خزیرانا سالا 2025 به‌رده‌وامه‌".

به‌رى نوكه‌ ژماره‌یه‌كا ستێرێن جیهانى وه‌كى كریستیانۆ رۆنالدۆ، كه‌ریم بێنزێما و نه‌یمار به‌رانبه‌ر مووچه‌یێن زه‌به‌لاح په‌یوه‌ندى ب رێزێن یانه‌یێن سعوودى كربوون و یاریێ بۆ دكه‌ن.