مه‌ترسییا دویرخستنا هه‌لبژارتییێ ئسپانیا و یانه‌یێن ئسپانى ژ قاره‌مانییێن ئه‌ورۆپى هه‌یه
بەلاڤ بکە
گاڤ
ژ به‌ر مایتێكرنا حكومه‌تا ئسپانیا د كاروبارێن ئێكه‌تییا ته‌پاپێى یا ئسپانی دا، مه‌ترسییا دویرخستنا هه‌لبژارتییێ ئسپانیا و یانه‌یێن ئسپانى ژ قاره‌مانییێن گرێداى ئێكه‌تییا ئه‌ورۆپى یا ته‌پاپێى ’یوێفا’ وه‌كى جاما ئه‌ورۆپا و چامپیۆنز لیگ و یورۆپا لیگ هه‌یه.
رۆژنامه‌یا ئاس یا ئسپانى ئه‌ڤرۆ پێنجشه‌مبییێ راگه‌هاند "پشكدارییا یانه‌یێن ئسپانى و هه‌لبژارتییێ ئسپانیا د قاره‌مانیێن ئه‌ورۆپى دا د مه‌ترسییێ دایه ژ به‌ر مایتێكرنا سیاسى د كاروبارێن ئێكه‌تییا ته‌پاپێى دا".
حكومه‌تا ئسپانیا به‌رى نوكه پێكئینانا لژنه‌یه‌كا تایبه‌ت بۆ برێڤه‌برنا ئێكه‌تییا ته‌پاپێى یا ئسپانیا راگه‌هاند بوو هه‌تا ده‌مێ ئه‌نجامدانا هه‌لبژارتنێن نوى.
جڤاتا نیشتیمانى یا وه‌رزشى كو ده‌سته‌یا حكومى یا به‌رپرسه ژ وه‌رزشێ ل ئسپانیا د به‌یانه‌كێ دا راگه‌هاند "ئه‌ڤ بڕیاره وه‌ك به‌رسڤ ل سه‌ر قه‌یرانا ئێكه‌تییا ته‌پاپێى و وه‌ك به‌رگریكرن ل به‌رژه‌وه‌ندییا گشتى ل ئسپانیا هاته دان".
رۆژنامه‌یا ئاس ئاماژه ب وێ چه‌ندێ ژى كریه "مایتێكرنا حكومه‌تێ د ئێكه‌تییا ته‌پاپێى یا ئسپانیا دا ژ بۆ ئێكه‌تییا ته‌پاپێى یا ئه‌ورۆپى ’یوێفا’ نه جهێ قه‌بویلكرنێ یه و ژ به‌ر ڤێ چه‌ندێ پاشه‌رۆژا ئسپانیا ل گه‌ل قاره‌مانیێن یوێفایێ ل به‌ر مه‌ترسییێ یه".
دیار ژى كریه "یوێفا نه‌یا گه‌شبینه ل دۆر وێ چه‌ندا رویداى و دبینیت كو مایتێكرنا حكومى بنپێكرنا یاسایێن فیفایێ یه".
