"ترامپ هزر د سزادانا وان وه‌لاتان دكه‌ت یێن دۆلارێ ئه‌مریكى د مامه‌له‌یێن بازرگانى دا بكارنه‌ئینن"
بەلاڤ بکە
گاڤ
سه‌رۆكێ به‌رێ یێ ئه‌مریكا هزر د وێ چه‌ندێ دا دكه‌ت ئه‌گه‌ر جاره‌كا دى بڤه‌گه‌ڕیته سه‌ر ده‌ستهه‌لاتێ سزایان ل سه‌ر وان وه‌لاتان بسه‌پینیت یێن مامه‌له‌یێن بازرگانى ب دۆلارى نه‌كه‌ن.
ل گۆره‌ى ئاژانسێن نووچه‌یان "شیره‌تكارێن دۆنالد ترامپ سه‌رۆكێ به‌رێ یێ ئه‌مریكا هه‌لسه‌نگاندنێ دكه‌ن ژ بۆ سه‌پاندنا سزایان ل سه‌ر وان وه‌لاتێن ل جهێ دۆلارى دراڤێن دى د مامه‌له و سه‌ره‌ده‌ریێن بازرگانى دا بكاردئینن".
دیار ژى كرینه "ترامپى ل به‌ره وان وه‌لاتێن دۆلارى د مامه‌له‌یێن بازرگانى دا بكارنه‌ئینن ب ژماره‌یه‌كا رێكان سزا بده‌ت وه‌كى سنوورداركرنا هنارده‌كرنا به‌رهه‌مێن ئه‌مریكى بۆ وان وه‌لاتان زێده‌بارى سه‌پاندنا پێناسه‌یا گۆمركى ل سه‌ر به‌رهه‌مێن وان وه‌لاتان بۆ ئه‌مریكا".
به‌رى نوكه ژماره‌یه‌كا وه‌لاتێن جیهانێ هزر د ده‌ستبه‌ردانێ دا ژ دۆلارى ئه‌مریكى د مامه‌له‌یێن بازرگانى دا كرینه یان ژى ده‌ست ب بجهئینانا وى رێكارى كرینه و به‌ره‌ڤ بكارئینانا هنده‌ك دراڤێن دى وه‌كى یوانێ چینى ڤه چووینه.
ل دويماهييا ئه‌ڤ ساله دێ هه‌ڤڕكییه‌كا گه‌رم د هه‌لبژارتنێن سه‌رۆكاتییا ئه‌مریكا دا دناڤبه‌را جۆ بایدن سه‌رۆكێ نها و به‌ربژارێ دیمۆكراتان و دۆنالد ترامپ سه‌رۆكێ به‌رێ یێ ئه‌مریكا ژ سالا 2016 تا 2020 و به‌ربژارێ كۆمارییان دا هه‌بیت.
