گاڤ

حكومه‌تا ئیراقێ بڕیار دا قه‌باره‌یێ بودجه‌یا سالا 2024 ژ 199 تریلیۆن دیناران بۆ 228 تریلیۆن دیناران زێده‌ بكه‌ت.

لژنه‌یا دارایى یا په‌رله‌مانێ ئیراقێ بڕیارا زێده‌كرنا قه‌باره‌یێ بودجه‌یا سالا 2024 دا، لژنه‌یا دارایى یا په‌رله‌مانێ ئیراقێ ژى راگه‌هاند ئه‌و ژ بڕیارێ سه‌رسۆرمانه‌.

موعین كازمى ئه‌ندامێ لژنه‌یا دارایى یا په‌رله‌مانێ ئیراقێ بۆ گاڤ راگه‌هاند "بۆ مه‌ وه‌ك لژنه‌یا دارایى نه‌یا پێشبینیكرى بوو كو حكومه‌تێ سه‌رجه‌مێ كۆژمه‌یێ یاسایا بودجه‌یا سالا 2024 ژ 199 تریلیۆن دیناران بۆ 228 تریلیۆن دیناران زێده‌كریه‌، ئه‌ڤه‌ زێده‌كرنه‌كا مه‌زنه‌ ل ده‌مه‌كێ د سالا 2023 دا 142 تریلیۆن دینار هاتبوونه‌ خه‌رجكرن".

ئاماژه‌ ب وێ چه‌ندێ ژى كر "زێده‌كرنا سه‌رجه‌مێ كۆژمه‌یێ یاسایا بودجه‌یێ بوویه‌ ئه‌گه‌رێ زێده‌بوونا رێژه‌یا كورتئینانێ".

ئاشكرا ژى كر "بودجه‌ نوكه‌ ل ده‌ف جڤاتا وه‌زیرانه‌ و دهێته‌ چاڤه‌رێكرن د هه‌یڤا بهێت دا بۆ جڤاتا نوینه‌ران بهێته‌ هنارتن".

ديار ژى كر "لژنه‌یا دارایى یا په‌رله‌مانى مێهڤاندارییا وه‌زیرێ پلاندانانێ ژ بۆ گه‌نگه‌شه‌كرنا راستڤه‌كرنان و پرۆژه‌یان و ئه‌گه‌رێن گیرۆبوونا هنارتنا یاسایا بودجه‌یا گشتى بۆ په‌رله‌مانى كر".