گاڤ
ژماره‌یه‌كا ژێده‌رێن ئاگه‌هدار رادگه‌هینن؛ كۆمپانیا ئه‌پل دێ ل هه‌یڤا گۆلانێ یا بهێت هنده‌ك ئامیره‌یێن نوى یێن ئایپادان، ئه‌و ژى مودێلێن نوى ژ ئایپاد ئێر iPad Air و ئایپاد پرۆ iPad Pro نه‌ به‌رده‌ستكه‌ت.
وان ژێده‌ران بۆ ئاژانسا بلۆمبێرگ راگه‌هاندن؛ ئامیره‌یێن نوى یێن بۆ ده‌مه‌كێ درێژ بوو چاڤه‌رێیا وان دهاته‌ كرن دێ ئایپاد پرۆ و ئایپاد ئێر بن.
ل گۆره‌ى بلۆمبێرگ "ئه‌ڤ گاڤه‌ وه‌كى دویماهییا درێژترین ماوه‌یى یه‌ بێى ئامیره‌یێن نوى یێن ئایپاد، ئه‌و ئامیره‌یێن بۆ جارا ئێكێ ل سالا 2010 ژ لایێ ستیڤ جۆبز دامه‌زرێنه‌رێ هه‌ڤپشك یێ كۆمپانیا ئه‌پل ڤه‌ هاتینه‌ راگه‌هاندن".
نێزیكى 18 هه‌یڤان ل سه‌ر دویماهیك ئامیره‌یێن ئایپاد یێن ئه‌پل بۆرین، ئه‌ڤ چه‌نده‌ ببوو ئه‌گه‌رێ هێواشبوونا داخوازیێ ل سه‌ر ئایپادان، وه‌كى بلۆمبێرگ ئاماژه‌پێكرى.
ئه‌پل به‌رى نوكه‌ پلان دانابوو ل دویماهییا ئادارێ یان ده‌ستپێكا نیسانێ ئایپادێن نوى به‌رده‌ست بكه‌ت، لێ كۆمپانى د نوكه‌ دا كار ل سه‌ر ب دویماهیك ئینانا سوفتوه‌یرێن تایبه‌ت ب ئامیره‌یان ڤه‌ دكه‌ت.
زێده‌بارى ڤێ چه‌ندێ، شاشه‌یێن مۆدێلێن نوى یێن ئایپادان پێدڤى ب ته‌كنیكێن دروستكرنێ یێن نوى و ئالۆز هه‌نه‌، ژ به‌ر ڤێ چه‌ندێ به‌رده‌ستكرنا ئایپادێن نوى ژ لایێ ئه‌پل ڤه‌ گیرۆبوو، ل گۆره‌ى بلۆمبێرگ.
بلۆمبێرگ به‌رى نوكه‌ راگه‌هاند بوو؛ مودێلێن نوى یێن ئایپاد پرۆ دێ شاشه‌یێن OLED یێن نوى و روهنتر تێدا هه‌بن، ل ده‌مه‌كێ دێ شاشه‌یا ب قه‌باره‌یێ 12.9 ئینچان بۆ جارا ئێكێ د ئایپاد ئێر دا هه‌بیت.
دهێته‌ چاڤه‌رێكرن بهایێ ئایپاد ئێر 599 دۆلار بن و بهایێ ئایپاد پرۆ دێ ب نێزێكى 200 دۆلاران ژێ پتر بیت.