گاڤ

به‌ربژارێ هه‌ڤپه‌یمانییا ته‌قه‌دوم بۆ سه‌رۆكاتییا په‌رله‌مانێ ئیراقێ راگه‌هاند؛ وى خۆ ژ به‌ربژاركرنێ بۆ سه‌رۆكاتییا په‌رله‌مانى هه‌روه‌سا ژ فراكسیۆنا ته‌قه‌دوم ڤه‌كێشا.

شه‌علان كره‌یم په‌رله‌مانتار ژ پارێزگه‌ها سه‌لاحه‌دین ئه‌ڤرۆ چارشه‌مبیێ د به‌یانه‌كێ دا راگه‌هاند "من خۆ ژ به‌ربژاركرنێ بۆ سه‌رۆكاتییا په‌رله‌مانى ڤه‌كێشا".

دیار ژى كر "ژ نوكه‌ تا ب دویماهیك هاتنا ڤێ خۆلا په‌رله‌مانى دێ وه‌ك په‌رله‌مانتاره‌كێ سه‌ربخۆ یێ دویر ژ فراكسیۆن و پارتێن سیاسى یێن دناڤ په‌رله‌مانى دا كار كه‌م".

ناڤهاتى داخواز ژ هێزێن سیاسى و په‌رله‌مانتاران كر ژڤانه‌كێ بۆ ئه‌نجامدانا روینشتنا سه‌رۆكێ په‌رله‌مانى ده‌ستنیشانبكه‌ن.

په‌رله‌مانێ ئیراقێ ل ناڤه‌راستا هه‌یڤا چرییا دوێ یا سالا بۆرى ب پشتبه‌ستن ب بڕیاره‌كا دادگه‌ها فیدرالى، ئه‌ندامه‌تییا محه‌مه‌د رێكان حه‌لبووسى د په‌رله‌مانى دا پشتى سكالایه‌كا له‌یس دلێمى په‌رله‌مانتارێ به‌رێ ل سه‌ر وى ب دویماهیك ئینابوو.

په‌رله‌مانێ ئیراقێ ل رۆژا 13ى هه‌یڤا كانوینا دوێ یا بۆرى روینشتنا هه‌لبژارتنا سه‌رۆكه‌كێ نوى بۆ په‌رله‌مانى ئه‌نجامدابوو و د گه‌ڕا ئێكێ یا ده‌نگدانێ دا چ ژ به‌ربژاران پڕانییا ره‌ها یا پێدڤى بده‌ستڤه‌نه‌ئینابوون و به‌رى گه‌ڕا دوێ یا ده‌نگدانێ بهێته‌ ئه‌نجامدان روینشتن هاتبوو هه‌لگرتن.

د گه‌ڕا ئێكێ یا ده‌نگدانێ دا شه‌علان كره‌یم به‌ربژارێ هه‌ڤپه‌یمانییا ته‌قه‌دوم یا محه‌مه‌د حه‌لبووسى پترین ده‌نگ بده‌ستڤه‌ئینابوون و ل دویڤ دا سالم عیساوى هاتبوو و تا نوكه‌ بابه‌تێ هه‌لبژارتنا سه‌رۆكێ په‌رله‌مانى ژ به‌ر سكالایێن ل دادگه‌ها فیدرالى ل سه‌ر روینشتنا ئێكێ یا هه‌لبژارتنا سه‌رۆكێ په‌رله‌مانى هه‌ین و هنده‌ك ئه‌گه‌رێن دى نه‌هاتیه‌ ئێكلاكرن.