گاڤ

رۆنالد ئه‌راوخۆ به‌رگریكارێ به‌رشلۆنا به‌رسڤا ره‌خنه‌یێن هه‌ڤالێ خۆ د یانه‌یێ دا ئێلكاى گوندوگانى ژ به‌ر كارتا سۆر یا یارییا پاریس سان جێرمان دا.

كارتا سۆر یا ئه‌راوخۆى د یارییا به‌رشلۆنا و پاریس سان جێرمان دا ل سێشه‌مبییا بۆرى د قووناغا چارێك دویماهیێ یا چامپیۆنز لیگێ دا ل خۆله‌كا 29ێ بوو ل ده‌مه‌كێ به‌رشلۆنا ب ئه‌نجامێ 1-0 یا پێشكه‌فتى بوو ل سه‌ر پاریس سان جێرمان و د یارییا ئێكێ ژى دا به‌رشلۆنا ب ئه‌نجامێ 2-3 ژ ده‌رڤه‌ى یاریگه‌ها خۆ سه‌ركه‌فتن ل سه‌ر پاریس سان جێرمان تۆماركربوو، لێ د یارییا دوێ دا، پشتى كارتا سۆر پاریس سان جێرمان ئه‌نجامێ یاریێ گوهارتبوو و ب 1-4 سه‌ركه‌فتن ل سه‌ر به‌رشلۆنا تۆماركربوو.

ئێلكاى گوندۆگان یاریكه‌رێ ئه‌لمانى یێ به‌رشلۆنا پشتى یاریێ بۆ تۆڕا CBS Sports ئاماژه‌ دا بوو كارتا سۆر بێى ناڤێ ئه‌راوخۆى بینیت و گۆتبوو "ئه‌ز نزانم باركۆلا یاریكه‌رێ پاریس سان جێرمان دا شێت گه‌هیته‌ ته‌په‌یێ یان نه‌، لێ بلا ده‌لیڤه‌ پێ هاتبا دان، یان ده‌لیڤه‌ ب گۆلچیێ مه‌ هاتبا دان مه‌ رزگار بكه‌ت یان هه‌تا گۆل ژى ل سه‌ر مه‌ هاتبا تۆماركرن، چونكى رێگریكرن ل یاریكه‌ره‌كێ و وه‌رگرتنا كارتا سۆر ل ده‌مه‌كێ گه‌له‌ك زوى ژ یاریێ، یاریێ دكۆژیت".

ژ لایێ خۆڤه‌، ئه‌راوخۆ یێ 25 سالى به‌رسڤا داخۆیانیێن گوندۆگانى دا و گۆت "ئه‌ز حه‌ز دكه‌م وى تشتێ هزر تێدا دكه‌م ل دۆر داخۆیانیێن گوندوگانى بۆ خۆ بهێلم، من هنده‌ك رێسا و بها هه‌نه‌ و پێدڤییه‌ رێز لێ بهێته‌ گرتن".