گاڤ

رەوش د ناڤبەرا ئسرائیلێ و حزبوللایا لبنانی دا گەهشتییە ئاستەکێ بترس، حزبوللا و گرۆپێن ئیراقی و چەندین هەڤپەیمانێن دی یێن ئیرانێ گەفان ل ئسرائیلێ دکەن و ئسرائیل دبێژیت: چەکدارێن بیانی چووینە لبنانێ.

ئاژانسا ئەسۆشیەیتد پرێس ل گۆرەی هندەک بەرپرسێن گرۆپێن چەکدار یێن نێزیکی ئیرانێ راگەهاند: هەر دەما ئسرائیل شەڕی ل دژی حزبوللایا لبنانی دەستپێبکەت، زێدەباری حۆسییان، ب هزاران چەکدار دێ ژ ئیراق، ئیران، سووریا، ئەفغانستان و پاکستانێ و چەندین وەلاتێن دی چنە لبنانێ و مل و ب ملێ حزبوللایێ شەڕی ل دژی ئسرائیلێ کەن.

ژێدەر هەروەسا دبێژیت: ب هزاران چەکدارێن وان وەلاتان، نوکە ل سوورییێ د ئامادەباشییێ دانە و هەر دەما شەڕ دەستپێبکەت، ئەو دێ دەربازی لبنانێ بن و شەڕی ل دژی ئسرائیلێ کەن.

حەسەن نەسرەللا، ئەمیندارێ گشتی یێ حزبوللایێ ل رۆژا چارشەمبییا بۆری راگەهاندبوو: حزبوللایێ پتری 100 هزار چەکداران هەنە، هەرچەندە چەندین وەلاتان پێشنیاز کرییە ل شەڕێ ل دژی ئسرائیلێ هاریکارییا وان بکەن، لێ حزبوللایێ تێرا خۆ چەکدار هەنە و پێدڤی ب هاریکارییا وان نینە.

ئەسۆشیەیتد پرێس ل گۆرەی هندەک ژێدەرێن ئسرائیلی دیارکرییە: گرۆپێن چەکدار یێن بیانی نوکە ل لبنانێ هەنە و تاکو حزبوللا خۆ ژ سنۆرێن ئسرائیلێ دویر نەکەت، ئسرائیل هێرشێن خۆ ل سەر باشۆرێ لبنانێ راناگریت.