گاڤ
بریارە سوبەهی رۆژا ئەینی، 28/6/2024 هەلبژارتنێن پێشوەخت یێن سەرۆکاتییا کۆماری یا ئیرانێ بهێنەکرن و چار کەس بەربژارن بۆ وەرگرتنا وی پۆستی.
تا دوهی شەش کەس بەربژاربوون، لێ هەر ئێک ژ عەلی رەزا زاکانی و ئەمیر حوسێن هاشمی خۆ ڤەکێشا، نوکە هەر ئێک ژ مەسعوود پزیشکیان، مستەفا پۆرمحەمەدی، سەعید جەلیلی و محەمەد باقر قالیباف بەربژارن.
ئەڤە جارا سییێ یە هەلبژارتنێن پێشوەخت ل ئیرانێ دهێنەکرن، ئێکەم سەرۆککۆمارێ ئیرانێ ئەبولحەسەنی بەنی سەدر پشتی ل سالا 1980 بوویە سەرۆککۆمار، ل 21ێ خزیرانا 1981 بۆ پەرلەمانی هاتە داخوازکرن و مافێ سەرۆکاتییێ ژێ هاتە وەرگرتن و هەلبژارتنێن پێشوەخت هاتنەکرن، پاشان دویەم سەرۆککۆمارێ ئیرانێ محەمەد رەجایی ل سالا 1981 هاتە تیرۆرکرن و بۆ جارا دوییێ هەلبژارتنێن پێشوەخت هاتنەکرن.
ئەڤە دبیتە جارێ سیێ هەلبژارتنێن پێشوەخت بهێنەکرن پشتی ئیبراهیم رەئیسی د رویدانەکا کەفتنا هەلیکۆپتەرێ دا ژیانا خۆ ژ دەستدایی.
بەربژارێن سەرۆکاتییێ:
مەسعوود پزیشکیان ل سالا 1954 ل مهابادێ ژ دایک بوویە و ئەندامێ پێنج خۆلێن پەرلەمانێ ئیرانێ بوو ل سالا 2008 تا ئەڤرۆ.
مستەفا پۆرمحەمەدی ل سالا 1959 ل قوم ژ دایکبوویە و سکرتێرێ گشتییێ کۆمەلەیا روحانیەتا خەباتکارە.
سەعید جەلیلی ل سالا 1965 ل مەشهەد ژ دایکبوویە، ئەندامێ جڤاتا دیارکرنا بەرژەوەندییێن ئیرانێ یە، نوینەرێ خامنەییە ل جڤاتا بلندا ئاسایشا نشتیمانی، پێشتر سەرۆکێ گرۆپێ دانوستاندکار یێ ئەتۆمی بوو د ناڤبەرا 2007 و 2013، بەربژارێ هەلبژارتنێن سەرۆکاتییا  ئیرانێ بوو ل سالێن 2013 و 2021.
محەمەد باقر قالیباف ل سالا 1961 ل خۆراسانێ ژ دایکبوویە، سەرۆکێ پەرلەمانێ ئیرانێ یە، ئەندامێ جڤاتا دیارکرنا بەرژەوەندییێن ئیرانێ یە،سەرۆکێ باژێرڤانیا تەهرانێ بوو ژ 2005 تا 2017، فەرماندەیێ گشتییێ پۆلیس و هێزێن ئاسمانی یێن سوپایێ پاسداران بوو، هەروەسا بەربژارێ هەلبژارتنێن سەرۆکاتیێ بوو ل سالا 2005 و 2013 و 2017ێ.