گاڤ 
هەردو بەربژارێن سەرۆکاتییا ئەمریکا دیبەیتەک کر و د وێ دیبەیتێ دا بۆچۆنێن هەڤدژ ل سەر چەندین بابەتێن کەسی، سیاسی، ئابۆری و گرێدایی سیاسەتا جیهانی دان.
جۆ بایدن، سەرۆکێ نوکە یێ ئەمریکا و بەربژارێ پارتییا دیمۆکرات یا ئەمریکی بۆ سەرۆکاتییا وی وەلاتی و دۆنالد ترامپ، سەرۆکێ بەرێ یێ ئەمریکا و بەربژارێ پارتییا کۆماری، ل بەرێ سپێدەهییا ئەڤرۆ ب دەمێ هەرێما کوردستانێ، دیبەیتەک کر و ل کەنالێ سی ئێن ئێن یێ ئەمریکی پەخش بوو.
د دانوستاندنا  هەردو سەرۆکان دا، ترامپی بایدن ب کەسەکێ پیر و ژ هش چوویی ناڤ کر، لێ بایدنی د بەرسڤێ دا گۆت: ترامپ گەلەک ژ من گەنجتر نینە، جوداهییا ژییێ من و یێ وی بتنێ سێ سالن.
ترامپی جارەکا دی بایدن ب تێکدانا ئابۆری، ڤەکرنا دەرگەهان بۆ کۆچبەرێن نەیاسایی، رێخۆشکرنێ بۆ ئیرانێ و چینێ و چەندین بابەتێن دی تومەتبار کر، لێ بایدنی د بەرسڤێ دا ئەو هەموو تومەت رەت کرن و گۆت: ترامپ کەسەکێ تومەتبارە، وی خەلک هاندابوو ب سەر کۆنگرێسی دا بگریت و د بانگەشەیا هەلبژارتنان ژی دا بەرتیل داینە.
ترامپی د بەرسڤێ دا گۆت: وی خەلک هان نەدایە ب سەر کۆنگرێسی دا بگریت و هەروەسا وی سێکس ل گەل ئەکتەرێن فلمێن پۆرن نەکرییە داکو نەچار ببیت بەرتیلان بدەت.
ترامپی چەندین جاران بایدن ب پیرەمێر ناڤ کر و گۆتێ: ئەگەر ل سەر خۆی، تێستا هشیارییێ بکە، پشتراستم ژ پێنج پرسیارێن دەستپێکێ دەرباز نابی. بایدنی د بەرسڤێ دا گۆت: من دو جاران کرییە، ب پلەیا هەرەباش دەرچوویمە. 
دیبەیتا هەردو سەرۆکان 90 خۆلەک بوون، ژ وان خۆلەکان، بایدن 35 خۆلەکان و ترامپ 40 خۆلەکان ئاخفتن.