ته‌قه‌دوم ل دۆر خۆڤه‌كێشانا ده‌هله‌كى: وى پۆست دڤيان لێ مه نه‌دانێ
بەلاڤ بکە
گاڤ
پارتا ته‌قه‌دوم يا ئيراقى به‌رسڤا خۆڤه‌كێشانا په‌رله‌مانتاره‌كێ ژ هه‌ڤپه‌يمانيا سه‌روه‌رى دا و راگه‌هاند كو وى پۆست بۆ خۆ و سكرتێرێ خۆ دڤيان لێ مه نه‌دانێ.
د ده‌مه‌كێ دى دا ژ ئه‌ڤرۆ ئێكشه‌مبيێ، په‌رله‌مانتار ره‌عه‌د ده‌هله‌كى خۆڤه‌كێشانا خۆ ژ هه‌ڤپه‌يمانيا سه‌روه‌رى راگه‌هاند بوو و ئه‌ڤ چه‌نده بۆ ئه‌گه‌رێن سياسى و نه‌دانا شايسته‌يێن پارێزگه‌ها ديالا ڤه‌گه‌ڕاند بوو.
د به‌يانه‌كا ئۆفيسا راگه‌هاندنێ يا ته‌قه‌دوم دا هاتيه؛ په‌رله‌مانتار ره‌عه‌د ده‌هله‌كى داخوازا پۆستێ سه‌رۆكێ لژنه‌يا ده‌ستپاكيێ يا په‌رله‌مانى كربوو و گه‌فێن خۆڤه‌كێشانێ ژ هه‌ڤپه‌يمانيێ كربوون ئه‌گه‌ر وى پۆستى وه‌رنه‌گريت.
تێدا هاتيه ژى؛ ل سه‌ر بڕيارا سه‌ركردايه‌تيا ته‌قه‌دوم و ژ به‌ر نه‌رازيبوونا په‌رله‌مانتاران ل سه‌ر داخوازيا وى، ئه‌و داخوازيه هاتبوو ره‌تكرن.
ديار ژى كريه؛ ده‌هله‌كى هه‌روه‌سا داخوازا پۆستێ جێگرێ پارێزگارێ ديالا ژ بۆ فادى محه‌مه‌د ياسين سكرتێرێ خۆ كربوو، لێ سه‌ركردايه‌تى و ئه‌ندامێن ته‌قه‌دوم دديتن كو ئه‌و نه كه‌سه‌كێ گونجايه بۆ وى پۆستى و كه‌سێن ژ وى ژ هه‌ژيتر ل پارێزگه‌هێ هه‌نه.
هه‌ڤپه‌يمانيا سه‌روه‌رى ژ هه‌ردو پارتێن ته‌قه‌دوم (37 په‌رله‌مانتار) ب سه‌رۆكاتيا محه‌مه‌د حه‌لبووسى و عه‌زم (34 په‌رله‌مانتار) ب سه‌رۆكاتيا خه‌ميس خه‌نجه‌ر پێكدهێت.
