بەختیار زێباری

وەلاتییێ ئیراقێ مافێ کرینا مولکی ل سەرانسەرێ ئیراقێ هەیە.
د حەفتیەکێدا2 جارە دادگەها فیدرالی بەحسا ڤی بابەتی دکەت، د دەمەکێدا چ ڕێگری نینە و چ کار نەهاتیەکرن بۆ ڕێگریکرنێ و چ پێشنیارێن نوو ژی نینە کۆ ڕێگریێ بکەن ل دژی ڤێ یاسایێ.
بۆچی ئەڤە د ڕژدن لسەر ڤێ یاسایێ:
ئەرێ مەرەما دادگەها فیدرالی چی یە؟
ئەم دێ د 2 خالاندا دیار کەین.
خالا ئێکێ:
هەتا نوکەژی خوە د ناڤا تاخان ژی دا (شیعە و سونە) ژ هەڤ جودانە نەخاسم باژێرێن وان ژی پرانییا وان د جودانە و ڕێکێ نادەن کو تێکهەل ببن و ئەردی ژی نافروشنە ئێک و دوو و تایبەت ژی سونە، دەڤەرا وان یا دیارە و تێکەل نابن دگەل شیعەیان، لێ پشتی شەرێ داعشێ یاسایا مولکداریێ جهێ خوە گرت.
مووسل وەک نموونە:
د نوکە دا پارچەیێن ئەردی ل مووسل تایبەت سەنتەرێ باژێری بەحسدکەم، بهایێ پارچەیێن ئەردی ل مووسل ژ بهایێ ئەردی ل پرانیا باژێرێن ئیراقێ ب بەغدا و هەولێر ڤە گرانترن، ئەرێ یا بەر ئاقلە باژێرەکێ هێشتا نە ئاڤەدانی و نە ئێمناهییا تەمام هەبیت لێ ئەرد و خانیێن وێ ب بهاترین بن لسەر ئاستێ ئیراقێ، ئەگەر بابەت (تەشەیوع) نەبیت چییە، واتە نوکە شیعە یێ هەموو بزاڤان دکەن ئەردێ سونەیان ب پارە ژێ وەرگرن و نفوسا خوە دناڤا باژێرێن سونی دا زێدەبکەن، و د چەند سالێن بهێت دا سونە وەکی فلستینیان دێ تەپا لسەرێ خوە دەن.
خالا دوویێ:
مەرەما وان ئەوە ب ڕێیا ڤێ یاسایێ دیموگرافیا هەرێما کوردستانێ بگوهورن، دەمێ شیعە ئەردێ سونەیان دکریت، سونە دهێتە هەولێر یان دهۆکێ یان سلێمانیێ ئەردێ کوردەکێ دکریت و هەمی ماف ژی یێت هەی، و شیعە بخوە ژی تژی هەرێمێ نە و ئەردی دکرن، واتە هەرێم یا ل هەمبەر تەعریبەکا نەرم و یاسایی.
بۆ نموونە:
حکومەتا ئیراقێ یا هندەک پێشینەیێن خەیالی ددەتە وەلاتیێن خوە یان فەرمانبەرێن خوە و تاکە مەرج ئەوە تو پارچەکا ئەردی یان خانیەکێ یان شوقەیەکێ بکەیە رەهینە و مەرج نینە ئەو ئەرد یان خانی ل کیڤەبت، گرنگ ل ئیراقێ بت واتە یا دیارە مەرەم چییە.
ئەم د بێ ئاگەهین لێ دادگەها فدرالی و حکومەتا ئیراقێ یا رژدە کو چ ڕێگری بۆ ڤێ یاسایێ چێنەبن و ولاتیێ ئیراقێ مافێ کرنیا مولکی ل هەر بوهوستەکا ئیراقێ هەبت.

باشە هەرێم نەشێت یاسایێ بگورت، ئەرێ ما نەشێت بێژیتە بازرگان و سەرمایەداران نابت هوون ژ بلی کوردان ئەرد و خانیان بدەنە کەسێ؟
یان ژی پارە گرنگترە ژ ئاخێ!