گاڤ

ژماره‌یه‌كا شاره‌زایێن ته‌كنولوژى هوشدارى ژ به‌رده‌وامیا پێشئێخستنا ئالاڤێن ژیریا ده‌ستكرد دان.
به‌رى نوكه‌ ژماره‌یه‌كا راپۆرتان ئاماژه‌ دابوونه‌ وێ چه‌ندێ كو ره‌نگه‌ ئالاڤێن ژیریا ده‌ستكرد ببنه‌ ئه‌گه‌رێ نه‌مانا ژماره‌یه‌كا پیشه‌یان ل جیهانێ و ب تایبه‌ت پشتى پێشڤه‌برنا ChatGPT.
ئیلۆن ماسك ملیاردێرێ ئه‌مریكى و ژماره‌یه‌كا شاره‌زایێن بوارێ ژیریا ده‌ستكرد د نامه‌یه‌كا ڤه‌كرى دا داخواز كرن كو "بلا بۆ ده‌مێ شه‌ش هه‌یڤان پێشڤه‌برنا سیسته‌مێن ژ رۆبۆتێ چه‌تینگێ ChatGPT پێشكه‌فتیتر، بهێته‌ راوه‌ستاندن".
هه‌روه‌سا نامه‌یا ژ ئینستیتۆتا Future of life یا كو پتر ژ هزار شاره‌زایان ئیمزاكرى، ئاماژه‌ دایه‌ گرنگیا پێشئێخستنا سیسته‌مێن ژیریا ده‌ستكرد ب تنێ ده‌مێ پشتراستیێ ژ وێ چه‌ندێ كو كارتێكرنێن وێ د ئه‌رێنى بن و مه‌ترسیێن وێ دێ د بن كونترۆلێ دا بن.
هه‌روه‌سا پرسیار كرینه‌؛ ئه‌رێ پێدڤیه‌ مه‌ژیێن نه‌یێن مرۆڤان كو ره‌نگه‌ ژماره‌یا وان ژ مرۆڤان پتر لێبهێت و ب ژیریێ ژ مرۆڤان پێشكه‌فتیتر بن و جهێ پیشه‌یێن مرۆڤان بگرن، بهێنه‌ پێشڤه‌برن؟