سه‌رۆك نێچیرڤان بارزانى: هه‌لبژارتن د ده‌مێ خۆ دا بهێنه‌كرن
بەلاڤ بکە
گاڤ
سه‌رۆكێ هه‌رێما كوردستانی و بالیۆزێ بریتانیا ل ئیراقێ پێشهاتین هه‌ولێر و به‌غدایێ و ره‌وشا ناڤخۆ یا هه‌رێمێ و پرسا هه‌لبژارتنان و ره‌وشا شنگالێ به‌حسكرن.
ئه‌ڤرۆ ئێكشه‌مبی سپێدێ 7-5-2023یێ نێچیرڤان بارزانى، سه‌رۆكێ هه‌رێما كوردستانێ و مارك برایسۆن ریچاردسۆن، بالیۆزێ بریتانیا ل ئیراقێ كۆمبوون و دوماهى پێشهاتێن په‌یوه‌ندیێن هه‌ولێر و به‌غدایێ، دانوستاندن و بزاڤێن چاره‌كرنا كێشه‌یێن ناڤبه‌را وان، ره‌وشا ناڤخۆ یا هه‌رێمێ، پرسا هه‌لبژارتنان و ره‌وشا شنگالێ به‌حسكرن.
هه‌ر دو ئالیان ب ئه‌رێنى به‌حس ل پێشڤه‌چوون و لێكتێگه‌هشتنا ناڤبه‌را هه‌ولێر و به‌غدایێ كر بۆ چاره‌كرنا كێشه‌یێن ناڤبه‌را وان و هه‌ڤڕابوون ل سه‌ر گرنگیا چاره‌كرنا ناكۆكیێن سیاسى یێن ناڤخۆ یا هه‌رێما كوردستانێ و كرنا هه‌لبژارتنان د ده‌مێ خۆ یێ دیاركرى دا.
ده‌رباره‌یى ره‌وشا شنگالێ هه‌ر دو ئالیان دوپاتى ل گرنگیا پاراستنا ئارامى و سه‌قامگێریا ناوچێ كر و رێگرتن ل گوتارا ره‌ق و كینێ و بجئینانا رێككه‌فتنا ناڤبه‌را هه‌رێما كوردستانێ و حكومه‌تا فیدرال بۆ ئاسایكرنا ره‌وشا شنگالێ ب پێدڤى و گرنگ ل قه‌له‌م دا.
هه‌روه‌سا په‌یوه‌ندیێن بریتانیا ل گه‌ل ئیراق و هه‌رێما كوردستانێ و هه‌ژماره‌كا پرسێن دى یێن جهێ گرنگیپێدانێ ته‌وه‌ره‌كێ دى یێ كۆمبوونێ بوون كو كونسلێ گشتى یێ بریتانیا ل هه‌ولێرێ ژى ئاماده‌یى كۆمبوونێ بوو.
