گاڤ

رێكخراوا ساخله‌میێ یا جیهانى ئه‌ڤرۆ دوشه‌مبیێ هوشداریه‌ك ژ به‌لاڤبوونا په‌تایه‌كا نوى دا و داخواز ژ وه‌لاتان كر كو چاكسازیێن پێدڤى بكه‌ن بۆ خۆبه‌رهه‌ڤكرنێ بۆ په‌تایه‌كا نوى یا چاڤه‌رێكرى.
تیدرۆس ئه‌دهانۆم گێبریسۆس رێڤه‌به‌رێ گشتى یێ WHO دیاركر "پێدڤیه‌ وه‌لاتێن جیهانى چاكسازیێن پێدڤى بۆ خۆبه‌رهه‌ڤكرنێ بۆ په‌تایه‌كا نوى كو ره‌نگه‌ په‌یدا ببیت، بكه‌ن".
زێده‌ ژى كر "ئه‌گه‌ر ئه‌م گوهۆڕینێن پێدڤى نه‌كه‌ین، كى دێ كه‌ت؟ و ئه‌گه‌ر ئه‌م نوكه‌ نه‌كه‌ین، پا دێ كه‌نگى كه‌ین؟".
دهێته‌ چاڤه‌رێكرن كۆمبوونێن ده‌سته‌یا گشتى یا رێكخراوێ كو دێ بۆ ده‌مێ 10 رۆژان ل جنێڤ هه‌ڤده‌م ل گه‌ل سالڤه‌گه‌را 75 یا دامه‌زراندنا رێكخراوێ برێڤه‌چن، ل سه‌ر ژماره‌یه‌كا ئالنگاریێن ساخله‌میێ یێن جیهانى و ب تایبه‌ت په‌تایان براوه‌ستن.
هه‌ر 194 وه‌لاتێن ئه‌ندام د رێكخراوێ دا دێ دانوستاندنان ل دۆر باشتركرنا رێكارێن به‌رسینگگرتنا وه‌لاتان بۆ گه‌فێن ساخله‌میێ یێن جیهانى كه‌ن و دێ د سالا بهێت دا رێككه‌فتنه‌كا نوى ل دۆر به‌رسینگگرتنا په‌تایان په‌سه‌ند كه‌ن.