وەختێ زڕتەک و شۆرەشگێران چوو
بەلاڤ بکە
لوقمان ئاسیهى
ئەڤێ نڤێسینا خوە ئەز دێ ب پرسیارەکێ دەستپێبکم: گەلۆ ئەگەر (گیڤارا)، ئەو (شۆرەشگێرێ مەزن)، د ئەڤی سەردەمى دە با و گۆتبا ئەز دێ ل همبەر ڤی و وێ هە شۆرەشەکێ هلکم، دا بسەرکەڤت؟ ئەز دبێژم نەخێر، چونکۆ هەر زوى جماعەت دا ب هەیڤێن دەستکرد و (GPS) و درۆنا کەڤنە دویڤ و هەر زوى دا (بەلا) وى ژ خوە ڤەکن!! دنیایا ئیرۆ نە دنیایا سالێن شێستانە ژ چەرخێ دەربازبووى، بلا ئەم هندەکێ واقعیانە هزربکن، زەمەنێ شیعارات و مێرخاس و شۆرەشگێران دەربازبوو، نهو زەمەن زەمەنێ بکارئینانا تەکنەلۆژیایێ یە ب هەموو جوین و تەخلیتێن خوە ڤە، ئێدى ئەو دەم چۆ (عەمێ گۆزێ) ل همبەر ( بشارێ چەتۆى) پێن خوە قەیدبدت و ئێک بێت سترانان ب مێرانیا وى بێژت! ئەڤرۆ نەوێروکترین کەس ب کلیکەکێ دشێت سەدێن وەک ( عەمێ گۆزێ و قاسم سلێمانی) ژ پشت دووراتیا حەفت بەحران بهنجنت و پرتپرتبکت. دنیا هۆسا لێهاتیە، کا چاوا نهۆ هندەک کەس شەڕێن لەشکەری یێن مەزن ب ئەتاریێ دکن عەین وەلاتێن مەزن و خودان دەست و سەنتەنەت ژى نهۆ یێ وێ رەنگە یاریا ئەتاریێ ب دنیایێ ل گۆرەى دابەشکرنا بەرژەوەندیان و کونترۆلکرنا ژێدەرێن وزێ و ئابۆرى دکن، دێ تشتەکێ دى ژى بێژم : ئەڤ حزب و گرۆپ و پتریا رێکخراوێن فەرمى و نە فەرمی یێن جیهانى ژى ئیرۆ (جزء)ـەکن ژ وێ یاریێ و دوکما کلیکرنا هەر هندەک ژ وان د دەستێ ئالییەکێ ب هێز و خودان سەنتەنەتێ ئەڤێ دونیایێ دە یە، ( ل من نەگرن و شاش د من نەگەهن) کو بێژم ب خوە حزبێن مە یێن ڤێرە ژى دوکمە و کلیکێن خوە یێن هەین کو د دەستێ جماعەتێ دەنە، ڤێجە بگرە ژ حزبێن عیراقى و هەمى رێکخستنێن کوردى و حەماس و هەمى جۆرێن ( حزب الله) و هەتا تو دگەهى هندەک دەولەت و سەرۆک دەولەتا ژى کو بێی فەرمان و کلیکێن جماعەتێ نەشێن گاڤەکێ باڤێژن یان ( ......) بکن. مەبەست، هەما هۆ ب سانەهى دێ بێژم ئەڤا نهۆ دناڤبەرا ئسرائیل و حەماس دە رووددت هندەکە ژ وێ یاریێ یا مە ل سەرى بەحسکری، و ئەڤا ل رۆژئاڤایێ کوردستانێ ژى هەمان تشت. ب کورتى؛ هەر تشت و لڤینا ل پەى بەرژەوەندییێن هەڤڕکێن دونیایێ نەبت نۆرمالە ل دەف وان وەلاتان ب مرۆڤ ڤە ژناڤ ببن و پاشى ب وان رێکخراوێن خوە یێن ب ناڤ مرۆڤی بێن رۆندکا ل سەر ببارینن و هاریکارییێن (ئینسانى) بۆ بینن. ل داویێ دێ بێژم: د ئەڤى سەردەمى دە یێ د ئەتاریێ و پۆبجى و تەکنەلۆژیایێ دە شەهرەزا نەبت بلا خوە ب چو شەڕ و شۆرەش و شیعاراتا ڤە نەکت و تنێ بلا دەستێ خوە بدت بەر سەرێ خوە و ناڤملێن جماعەتێ ب سیاسەت ڤەخوەرینت و هەو.
