گاڤ

کۆڤارەکا ئەمریکی بەحس ل خالێن ئەرێنی و نەرێنی یێن مان یان دەرکەفتنا هێزێن ئەمریکی ژ ئیراقێ دکەت و رادگەهینیت: ئەگەر ئەمریکا ژ ئیراقێ دەربکەڤیت ژی، دشێت هندەک هێزێن خۆ بهێلیتە ل هەرێما کوردستانێ.

کۆڤارا فۆرن پۆلسی یا ئەمریکی د راپۆرتەکێ دا راگەهاند: پشتی پتر ژ 20 سالان ل سەر مانا هێزێن ئەمریکی ل ئیراقێ، نوکە دەم هاتییە ئیدارەیا جۆ بایدن، سەرۆکێ ئەمریکا هزر د دەرخستنا هێزێن ئەمریکی ژ ئیراقێ دا بکەت، ژبەر کو نوکە بەحس هەیە پەرلەمانێ ئیراقێ وێ بریارێ بدەت و ل وی دەمی ئەو دێ بۆ ئەمریکا وەک شکەستنەکێ بیت.

"ترسا دوبارەبوونا سیناریۆیا ئەفغانستانێ هەیە"

د راپۆرتێ دا هاتیە ژی: ئەگەر ئەمریکا بریارا دەرکەفتنێ نەدەت ژی، پێدڤیە بزانیت نوکە ل ئیراقێ هەبوونا گەلەک هێزێن ئەمریکی جهێ قەبویلکرنێ نینە و دبیت ل هەر دەمەکی ئەمریکا نەچار ببیت هێزێن خۆ دەربێخیت، لەورا باش نینە ئەو دەرکەفتن ژ نیشکەکێ ڤە بیت. ئەگەر هێزێن ئەمریکی ژ نشکەکێ ڤە ژ ئیراقێ دەربکەڤن، دبیت ل وی دەمی سیناریۆیا ئەفغانستانێ دوبارە ببیت و دبیت ژی هێزێن ئەمریکی ب شەڕ ژ ئیراقێ دەربکەڤن، کو د ڤان دو سیناریۆیان دا ئەمریکا دێ ب شکەستی هێتە هەژمارتن و دێ گومان کەڤیتە سەر هێزا سوپایێ وێ و هەروەسا نیەتێن ئەمریکا وەک دەولەت.

"هێزێن ئەمریکی دشێن ل هەرێما کوردستانێ بمینن"

فۆرن پۆلسیێ د راپۆرتا خۆ دا ئاماژە دایە هەرێما کوردستانێ ژی و دایە زانین: ئەمریکا ژ سەربازگەهێن خۆ یێن ل هەرێما کوردستانێ پشتەڤانییا هندەک گرۆپان ل سووریێ دکەت، لێ ب دەرکەفتنا ئەمریکا ژ ئیراقێ، واشنتون دشێت هندەک ژ هێزێن خۆ بهێلیتە ل هەرێما کوردستانێ و ب رێکا وان هێزان بەردەوامیێ بدەتە پشتەڤانییا وان گرۆپێن ل باکۆرێ سووریێ.

راپۆرتا کۆڤارا فۆرن پۆلسی د دەمەکی دایە کو رۆژانە ل ئیراقێ دەنگێن ل دژی ئەمریکا بلند دبن و چەندین گرۆپێن ئیراقی یێن چەکدار داخوازا دەرکەفتنا هێزێن ئەمریکی دکەن و ئەگەر ژ دویماهی فەرمانا ئیرانێ و سەرکردەیێن گرۆپێن چەکدار یێن نێزیکی ئیرانێ نەبا، ئەگەر هەبوون د ڤێ مەهێ دا ل ئیراق، سووریا و ئوردنێ چەندین هێرشێن دی ل ژی ئەمریکا هاتبانە کرن.