ژمارهیا سهرهدانان بۆ مۆزهخانهیان ل جیهانێ هێدى هێدى بۆ ئاستێن بهرى پهژیكا كۆرۆنایێ ڤهدگهڕیت
گاڤ
د سالا بۆرى یا 2023 دا 176 ملیۆن كهسان سهرهدانا 100 باشترین مۆزهخانهیان ل سهرانسهرى جیهانێ كرینه پشتى كو د سهردهمێ بهلاڤبوونا پهژیكا كۆرۆنایێ دا ژمارهیا سهرهدانان ب شێوهیهكێ بهرچاڤ كێمبووى.
ل گۆرهى دویڤچوونهكا رۆژنامهیا The Art Newspaper؛ ژمارهیا كهسێن سهرهدانا مۆزهخانهیان ل جیهانێ كرین تا راددهیهكێ بۆ ئاستێن بهرى پهژیكا كۆرۆنایێ ڤهگهڕیایه.
ئاشكرا ژى كریه؛ د سالا 2023ێ دا، 176 ملیۆن كهسان سهرهدانا باشترین 100 مۆزهخانهیان ل جیهانێ كرینه.
ئاماژه ب وێ چهندێ ژى كریه "ژ بهر بهلاڤبوونا پهژیكا كۆرۆنایێ ژمارهیا كهسێن سهرهدانا مۆزهخانهیان ل سهرانسهرى جیهانێ كرین، كێمبوویه".
دیار ژى كریه "ل سالا 2019 دویماهیك سالا بهرى بهلاڤبوونا پهژیكا كۆرۆنایێ 230 ملیۆن كهسان سهرهدانا 100 مۆزهخانهیێن پترین سهرهدان ل جیهانێ بۆ دهێنه كرن كربوون، پاشى ل سالا 2020 ژمارهیا كهسێن سهرهدانا مۆزهخانهیان كرین ژ بۆ 54 ملیۆن كهسان كێمببوو، ههروهسا ل سالا 2021 ژمارهیا كهسێن سهرهدانا مۆزهخانهیان كرین 71 ملیۆن كهس بوون، ل دهمهكێ ل سالا 2022ێ 141 ملیۆن كهسان سهرهدانا مۆزهخانهیان كربوون".
مۆزهخانهیا لوڤر ل پاریس پایتهختێ فرهنسا ل رێزا ئێكێ بۆ ژمارهیا سهرهدانان هات كو د سالا 2023 دا 8.9 ملیۆن كهسان سهرهدانا وێ كربوون ئانكۆ ب كێمبوونا ب تنێ ب رێژهیا 8% ب ههڤبهركرن ل گهل سالا 2019 یا بهرى بهلاڤبوونا پهژیكا كۆرۆنایێ.