مێتا دێ بهایێ پشكدارییا ههیڤانه بۆ فهیسبووكى و ئینستاگرامى كێمكهت
گاڤ
كۆمپانیا مێتا پێشنیار كریه بهایێ پشكدارییا ههیڤانه د فهیسبووك و ئینستاگرامى دا ژ 9.99 دۆلاران بۆ 5.99 دۆلاران بهێته كێمكرن.
بهرى نوكه مێتایێ پشكدارییا ب پاره بۆ بكارهینهرێن فهیسبووك و ئینستاگرامى ل ئهورۆپا بهردهستكربوو كو ل گۆرهى وێ ریكلام بۆ بكارهینهران ناهێنه نیشاندان بهرانبهر دانا وان بۆ پارهیێ پشكدارییا ههیڤانه، ئهڤ چهنده ببوو ئهگهرێ رهخنهگرتنێ ل مێتایێ و هندهك كهسان گۆتن "مێتا داخوازا پارهى ژ بكارهینهران ژ بۆ گرهنتیكرنا پاراستنا تایبهتمهندییا وان دكهت".
مێتایێ ل ههیڤا چرییا دوێ یا سالا بۆرى پشكدارییا ب پاره بۆ فهیسبووكى و ئینستاگرامى ل ئهورۆپا بهردهستكربوو وهك پێگیرى ب یاسایا بازارێن دیجیتال یا ئهورۆپى ئهوا كو شیانێن مێتایێ بۆ بهرچاڤكرنا ریكلامان بۆ بكارهینهران د فهیسبووك و ئینستاگرامى دا بێى رازیبوونا وان سنووردار دكهت و ئهڤ چهنده زیانێ دگههینیته داهاتێ مێتایێ.
تیم لامب پارێزهرێ مێتایێ ل ههمبهر كۆمیسیۆنا ئهورۆپى گۆت "مه پێشنیارا كێمكرنا بهایێ پشكدارییا ههیڤانه ژ 9.99 دۆلاران بۆ 5.99 دۆلاران بۆ ئهكاونتێ سهرهكى ههروهسا كێمكرنا ب بهایێ 4 یۆرۆیان بۆ ههر ئهكاونتهكێ زێده كریه".
ئهگهر ههر كۆمپانییهك پێگیریێ ب یاسایا بازارێن دیجیتال یا ئهورۆپى نهكهت رهنگه ب سزایێن دارایى یێن دگههنه نزیكى رێژهیا 10% ژ داهاتێن وان یێن سالانه بهێنه سزادان.