گاڤ

پشتى دیارنه‌بوونا چ نووچه‌یان بۆ ده‌مێ دو هه‌یڤان ل دۆر وێ، كه‌یت میدلتۆن شازاده‌یا وێلزێ راگه‌هاند؛ ئه‌و تووشى په‌نجه‌شێرێ بوویه‌ و چاره‌سه‌ریێ وه‌ردگریت.

میدلتۆن ئه‌ڤرۆ ئه‌ینیێ د ئه‌كاونتێ خۆ دا ل سه‌ر تۆرێ ئێكس راگه‌هاند "نشته‌رگه‌رییه‌ك بۆ زكێ من ل كانوینا دوێ یا بۆرى‌ هاتبوو‌ كرن و ل ده‌ستپێكێ هزر نه‌دهاته‌ كرن كو په‌نجه‌شێر بیت، لێ پشتى هینگێ د تاقیكرنان دا دیاربوو كو تووشى په‌نجه‌شێرێ بوویمه‌".

كه‌یت میدلتۆن یا 42 سالى هه‌ڤژینا شازاده‌یێ بریتانیا ولیامى یه‌، كه‌یت میدلتۆن دیار ژى دكه‌ت "تيما من يا پزیشكى ئاماژه‌ دا گرنگییا وه‌رگرتنا خۆله‌كا چاره‌سه‌رییا كیمیایى یا خۆپارێزیێ و ئه‌ز د نوكه‌ دا د قووناغێن ده‌ستپێكێ یێن چاره‌سه‌ریێ دا مه‌".

زێده‌تر ژى گۆت "ئه‌ز یا باشم و هه‌ر رۆژ ب هێزتر دبم ئه‌و ژى ب فوكۆسكرنێ ل سه‌ر وان تشتێن هاریكارییا من بۆ چاكبوونێ دكه‌ن، هه‌بوونا ویلیامى ب ره‌خ من ڤه‌، ژێده‌ره‌كه‌ بۆ پشتراستیێ".

به‌رى چه‌ند رۆژان بنه‌مالا شاهانه‌ ل بریتانیا راگه‌هاند بوو كو ئه‌و دێ نووچه‌یه‌كێ نه‌خۆش راگه‌هینن.