گاڤ

لێكۆلینه‌كا نوى ئاشكرا كریه‌؛ بكارئینانا زارۆكان بۆ ئامیره‌یێن ئه‌له‌كترۆنى وه‌ك موبایل و ئایپادان بۆ ده‌مێن درێژ دبیته‌ ئه‌گه‌رێ لاوازبوونا ئاستێ وان بۆ فێربوونا زمانى.

لێكۆله‌رێن ئوسترالى هۆشدارى ژ وێ چه‌ندێ داینه‌ كو بۆراندنا زارۆكان بۆ ده‌مێن درێژ به‌رانبه‌ر ئامیره‌یێن ئه‌له‌كترۆنى دبیته‌ ئه‌گه‌رێ ژده‌ستدانا وان بۆ چركه‌یێن گرنگ بۆ پێشڤه‌برنا شیانێن خۆ یێن زمانى.

ل گۆره‌ى لێكۆلینا د كۆڤارا ده‌سته‌یا ئه‌مریكى یا پزیشكییا زارۆكان دا به‌لاڤبووى "زارۆك ده‌مێ ئامیره‌یێن ئه‌له‌كترۆنى بكاردئینن، ئه‌و كێمتر سه‌ره‌ده‌ریێ ل گه‌ل پێگه‌هشتییان دكه‌ن، كێمتر په‌یڤان ژ ده‌یكوبابێن خۆ گوهلێدبن و كێمتر گوهـ ل ئاخفتنان دبن كو ئه‌ڤ چه‌نده‌ بۆ ئاڤاكرنا شیانێن وان یێن زمانى د گرنگن".

تیما لێكۆلینێ ب سه‌ركردایه‌تییا مارى بره‌ش ژ زانكۆیا ئه‌دیلاید یا ئوسترالى لێكۆلین ل سه‌ر داتایێن 220 خێزانان ب بكارئینانا ته‌كنولۆژییا زانینا ئاخفتنێ كربوون و تێدا ده‌مێ ل به‌رانبه‌ر شاشه‌یێن ئامیره‌یێن ئه‌له‌كترۆنى هاتیه‌ بۆراندن و ژینگه‌ها زمانى ب گشتى بۆ زارۆكێن ژیێ وان دناڤبه‌را 12 هه‌یڤان هه‌تا 36 هه‌یڤان دا بۆ ده‌مێ نزیكى 16 ده‌مژمێران رۆژانه‌ هاتبوونه‌ تۆماركرن.

لێكۆلینێ ئاشكرا كریه‌ "هندى پتر ده‌م به‌رانبه‌ر شاشه‌یێن ئامیره‌یێن ئه‌له‌كترۆنى هاتبیته‌ بۆراندن، ئانكۆ ئاخفتنا دناڤبه‌را زارۆكان و ده‌یكوبابان دا كێمتر بوویه‌، ب ڤێ چه‌ندێ ژى زارۆكان گوهـ ل په‌یڤێن كێمتر بوویه‌ ژ پێگه‌هشتییان و كێمتر پشكدارى د ئاخفتنێ دا كرینه‌".

رێكخراوا ساخله‌میێ یا جیهانى ژى د نویترین راسپارده‌یێن خۆ دا داخواز كربوو زارۆكێن د بن 5 سالیێ دا ده‌مه‌كێ كێمتر به‌رانبه‌ر شاشه‌یێن ئامیره‌یێن ئه‌له‌كترۆنى ببۆرینن دا كو زارۆك ب شێوه‌یه‌كێ ساخله‌م گه‌شه‌ بكه‌ن.