سه‌فین دزه‌یى: بایدنى دوپاتى ل سه‌ر چاره‌كرنا كێشه‌یێن دناڤبه‌را هه‌ولێر و به‌غدا دا كر
بەلاڤ بکە
گاڤ
به‌رپرسێ فه‌رمانگه‌ها په‌یوه‌ندیێن ده‌رڤه یا حكومه‌تا هه‌رێما كوردستانێ راگه‌هاند؛ سه‌رۆكوه‌زیرێ ئیراقێ ل گه‌ل دوباره هنارده‌كرنا په‌ترۆلا كوردستانێ یه و سه‌رۆكێ ئه‌مریكا دوپاتى ل سه‌ر چاره‌كرنا كێشه‌یێن دناڤبه‌را هه‌ولێر و به‌غدا دا كر.
سه‌فین دزه‌یى ئه‌ڤرۆ دوشه‌مبیێ راگه‌هاند "جۆ بایدن سه‌رۆكێ ئه‌مریكا دوپاتى ل سه‌ر چاره‌كرنا كێشه‌یێن دناڤبه‌را هه‌ولێر و به‌غدا دا ب رێكا دیالۆگێ كر و دیار ژى كر كو سه‌قامگیرییا هه‌رێما كوردستانێ و ئیراقێ بۆ ئه‌مریكا یا گرنگه".
سه‌فین دزه‌یى ئاماژه ب وێ چه‌ندێ ژى كر "سوودانى ل گه‌ل وێ چه‌ندێ یه په‌ترۆلا هه‌رێما كوردستانێ ب زویترین ده‌م بهێته هنارده‌كرن".
زێده‌تر ژى گۆت "هیڤیدارم بابه‌تێ مووچه‌ى نه‌بیته كارتا فشارێ و بابه‌تێ گه‌رم یێ میدیایان، سه‌رۆكوه‌زیرێ ئیراقێ یێ رژده بۆ چاره‌سه‌ركرنا كێشه‌یێن دناڤبه‌را هه‌ولێر و به‌غدا دا".
محه‌مه‌د شیاع سوودانى سه‌رۆكوه‌زیرێ ئیراقێ د سه‌ره‌دانه‌كێ دا ل ئه‌مریكا یه و ئه‌ڤرۆ ژماره‌یه‌كا بابه‌تان ل گه‌ل جۆ بایدن سه‌رۆكێ ئه‌مریكا به‌حسكرن.
سه‌رۆكێ ئه‌مریكا پێگیرییا وه‌لاتێ خۆ ب پاراستنا هه‌ڤپشكێن خۆ راگه‌هاند.
