گاڤ

وەزیرێ دەرڤە یێ ئیرانێ دوپات کر کو بەری ئەو هێرش بکەنە ئسرائیلێ، وان ئەمریکا ئاگەهدار کربوو و پشتی هێرشێ ژی وان زانیاری داینە ئەمریکا.

ئەڤرۆ رۆژا پێنجشەمبی ئاژانسا ئێرنا یا فەرمی یا ئیرانێ ژ زارێ حسێن ئەمیر عەبدوللـەهیان، وەزیرێ دەرڤە یێ ئیرانێ راگەهاند: ئسرائیلێ ب ئارمانجکرنا بالیۆزخانەیا ئیرانێ ل دیمەشقێ و کوشتنا هندەک ژ سەرکردەیێن ئیرانی، یاسایێن نێڤدەولەتی بنپێ کرن، لەورا د چارچووڤەیێ یاسایێن نێڤدەولەتی دا وان ماف هەبوو بەڕەڤانییێ ژ خۆ بکەن و بەرسڤا هێرشان بدەن، لەورا وان هێرش کرە ئسرائیلێ.

وەزیرێ دەرڤە یێ ئیرانێ کو نوکە بۆ پشکدارییێ د کۆمبوونا جڤاتا ئاساییشا نێڤدەولەتی دا ل نیۆیۆرکێ یە، دیار ژی کر: بەری ئەو هێرش بکەنە ئسرائیلێ، وان ب رێکا کەنالێن دپلۆماسی ئەمریکا ئاگەهدار کربوو کو دێ هێرش کەنە ئسرائیلێ و دوپاتی دابوو ئەمریکا کو هێرش ل دژی بەرژەوەندییێن ئەمریکا نابیت و هەروەسا پشتی هێرشێ ژی، وان زانیاری دابوونە ئەمریکا.

عەبدوللـەهیانی دوپات ژی کر: ئەگەر ئەمریکا پشکداری شەڕی نەبیت، ئەو بەرژەوەندییێن ئەمریکا ل دەڤەرێ ناکەنە ئارمانج، ژبەر کو ئەو ناخوازن شەڕ یێ بەردەوام بیت و دەڤەر زێدەتر ئالۆز ببیت.

داخۆیانییێن وەزیرێ دەرڤە یێ ئیرانێ د دەمەکی دانە کو دویماهی جار شڤێدی وەزارەتا بەرگرییا ئەمریکا پێنتاگۆنێ دوپات کرییە ئەمریکا ناخوازیت شەڕەکێ ئێکسەر ل گەل ئیرانێ بکەت.

ئەڤرۆ جڤاتا ئاساییشا نێڤدەولەتی دێ کۆمبوونەکا دی دەربارەی شەڕێ ئسرائیل و حەماسێ کەت و ئیران و هەڤپەیمانێن فەلەستینێ دخوازن شەڕ ب دویماهی بهێت و هێزێن ئسرائیلی ژ غەزە دەربکەڤن.