گاڤ

سه‌رۆكوه‌زیرێ ئیراقێ ژ ئه‌مریكا راگه‌هاند؛ ئیراق سالانه‌ ب بهایێ چار ملیار دۆلاران غازێ هاورده‌ دكه‌ت.

محه‌مه‌د شیاع سوودانى سه‌رۆكوه‌زیرێ ئیراقێ ئه‌ڤرۆ پێنجشه‌مبیێ ل گه‌ل كۆمپانیێن ئه‌مریكى یێن بوارێ په‌ترۆلێ و غازێ كۆمبوو.

محه‌مه‌د شیاع سوودانى راگه‌هاند "تێچوویێن هاورده‌كرنا غازێ سالانه‌ ل سه‌ر ئیراقێ 4 ملیار دۆلارن و ل ئیراقێ سالانه‌ نزیكى 1300 ملیۆن پیێن چارگۆشه‌ یێن غازێ دهێنه‌ سۆتن و ڤێ چه‌ندێ كارتێكرن ل سه‌ر ژینگه‌هێ هه‌یه‌".

سه‌رۆكوه‌زیرێ ئیراقێ د ده‌مه‌كێ دى دا ژى ژ ئه‌ڤرۆ دیاركربوو "مه‌ دیتنه‌كا ته‌مام بۆ باشترین وه‌به‌رهێنانێ د په‌ترۆل و غازێ دا دانایه".

گۆتبوو ژى‌ "مه‌ پلان هه‌یه‌ د ماوه‌یێ 3 تا 5 سالان دا پێدڤیاتیێن خۆ ژ غازێ دابینبكه‌ین و غازێ هاورده‌ نه‌كه‌ین".

ئيراق د نوكه‌ دا رێژه‌یه‌كا مه‌زن یا غازێ ژ ئیرانێ هاورده دكه‌ت و د كاركرنا وێستگه‌هێن كاره‌بێ دا ل ناڤه‌راست و باشوورێ ئیراقێ بكاردئینیت.