د سالهكێ دا ئیراق بۆ هاوردهكرنا بهرههمێن چاندنێ و ئاژهلى یێن ئیرانى ل رێزا ئێكێ هات
گاڤ
ئیراق بۆ هاوردهكرنا بهرههمێن چاندنێ و ئاژهلى یێن ئیرانى د سالا ئیرانى یا بۆرى دا (ژ 21/3/2023 ههتا 21/3/2024) ل رێزا ئێكێ د رێزبهندییا وهلاتێن جیهانێ دا هات.
سهید لهتیفى پهیڤدارێ لژنهیا كاروبارێن نێڤدهولهتى و گهشهپێدانا بازرگانیێ د مالا پیشهسازى و بازرگانیێ یا ئیرانى دا ئهڤرۆ ئێكشهمبییێ دیاركر؛ ئیراق هاوردهكارێ ئێكێ یه بۆ بهرههمێن چاندنێ و ئاژهلى یێن ئیرانى كو ب بهایێ نزیكى 2 ملیار دۆلاران ئهو بهرههمه ژ ئیرانێ هاوردهكرینه.
ناڤهاتى بۆ ئاژانسا میهر راگههاند "د سالا ئیرانى یا بۆرى دا، ئیرانێ پتر ژ 8 ملیۆن و 803 هزار تهنێن بهرههمێن ئاژهلى و ماسییان و چاندنێ و خوارنێ ب بهایێ 6 ملیار و 298 ملیۆن و 163 هزار و 654 دۆلاران هناردهى دهرڤه كرینه، ب گهشهپێدانا ب رێژهیا 22.5% یا بهایێ بهرههمان".
ئاشكرا ژى كر "ئیراق بۆ هاوردهكرنا بهرههمێن ئیرانى یێن چاندنێ و ئاژهلى ل رێزا ئێكێ د رێزبهندییا وهلاتان دا هات كو ب بهایێ ملیارهك و 986 ملیۆن دۆلاران ئهو بهرههمه هاوردهكرینه".
ئاماژه ب وێ چهندێ ژى كر "بۆ هاوردهكرنا بهرههمێن چاندنێ و ئاژهلى یێن ئیرانى، ئیمارات ل رێزا دوێ ب بهایێ 751 ملیۆن دۆلاران، رۆسیا ل رێزا سیێ ب بهایێ 521.5 ملیۆن دۆلاران، پاكستان ل رێزا چارێ ب بهایێ 508 ملیۆن دۆلاران و ئهفغانستان ل رێزا پێنجێ ب بهایێ 429.4 ملیۆن دۆلاران هاتن".