سه‌رۆك نێچیرڤان بارزانى و سوودانى دوپاتییێ ل سه‌ر پێشڤه‌برنا په‌یوه‌ندیێن دناڤبه‌را هه‌ولێر و به‌غدا دا دكه‌ن
بەلاڤ بکە
گاڤ
سه‌رۆكێ هه‌رێما كوردستانێ و سه‌رۆكوه‌زیرێ ئیراقێ ل به‌غدا كۆمبوون و دوپاتی ل سه‌ر پێشڤه‌برنا په‌یوه‌ندیێن دناڤبه‌را هه‌ولێر و به‌غدا دا كرن.
نێچیرڤان بارزانى سه‌رۆكێ هه‌رێما كوردستانێ و محه‌مه‌د شیاع سوودانى سه‌رۆكوه‌زیرێ ئیراقێ ئه‌ڤ شه‌ڤه ل به‌غدا كۆمبوون.
سه‌رۆكاتییا هه‌رێما كوردستانێ د به‌یانه‌كێ دا راگه‌هاند "سه‌رۆك نێچیرڤان بارزانى و سه‌رۆكوه‌زیرێ ئیراقێ دوپاتییێ ل سه‌ر پێشڤه‌برنا په‌یوه‌ندیێن دناڤبه‌را هه‌ولێر و به‌غدا دا هه‌روه‌سا به‌رده‌وامییا دانوستاندنان ل دۆر پرسێن هه‌ڤپشك دكه‌ن".
د به‌یانێ دا هاتیه ژى "د كۆمبوونه‌كێ دا، ره‌وشا ئیراقێ ب گشتى و گاڤێن حكومه‌تا ئیراقێ د بوارێن خزمه‌تگۆزارى و گه‌شه‌پێدانێ دا ل گۆره‌ى كارنامه‌یا حكومه‌تێ بۆ باشتركرنا ره‌وشا خزمه‌تگۆزارى و ژیارا وه‌لاتییان ل هه‌مى ئیراقێ هاتنه به‌حسكرن".
دیار ژى كریه "هه‌ردو لایان دوپاتى ل سه‌ر گرنگییا به‌رده‌وامییا دانوستاندنێن ئاڤاكه‌ر یێن تایبه‌ت ب پرسێن هه‌ڤپشك دناڤبه‌را حكومه‌تا ئیراقێ و هه‌رێما كوردستانێ دا كرن، هه‌روه‌سا به‌حس ل دویماهیك پێشهاتێن سیاسى یێن وه‌لاتى كرن و دوپاتى ل سه‌ر گرنگییا به‌رده‌وامییا پشته‌ڤانییێ ل بزاڤێن حكومه‌تێ ل سه‌ر ئاستێ ناڤخۆ و ده‌رڤه هه‌روه‌سا بهێزكرنا په‌یوه‌ندیێن دناڤبه‌را هه‌ولێر و به‌غدا دا كرن و بۆ ڤێ چه‌ندێ پشته‌ڤانییا هه‌مى لایه‌نێن سیاسى یێن ئیراقێ ب گرنگ زانین".
به‌یانا سه‌رۆكاتییا هه‌رێمێ ئاماژه ب وێ چه‌ندێ ژى كریه "ژ لایێ خۆڤه، سه‌رۆكوه‌زیر سوودانى سه‌ره‌دانێن سه‌رۆك نێچیرڤان بارزانى بۆ به‌غدا بۆ چاره‌كرنا هه‌مى پرسێن هه‌ڤپشك ب گرنگ لقه‌له‌مدا و د به‌رانبه‌ر دا سه‌رۆكێ هه‌رێما كوردستانێ سوپاسییا گاڤێن سه‌رۆكوه‌زیر سوودانى و پێداگیرییا وى ل سه‌ر دانوستاندنان دناڤبه‌را هه‌مى لایه‌نان دا ب مه‌به‌ستا سه‌قامگیرییا وه‌لاتى كر".
هه‌ر ئه‌ڤ شه‌ڤه سه‌رۆك نێچیرڤان بارزانى ل به‌غدا پشكدارى د كۆمبوونا هه‌ڤپه‌یمانییا برێڤه‌برنا ده‌وله‌تێ ژى دا كر.
