گاڤ

رۆژەک بۆ دەستپێکرنا کونفرانسێن ناڤخۆ یێن پارتی دیمۆکراتی کوردستان مایە و ئەندامەکێ سەرکردایەتییا پارتی دبێژیت: دێ گوهۆڕینێن گرنگ د ناڤ پارتی دا هێنە کرن.

بریارە سوبەهی رۆژا سێشەمبی 25 خزیرانێ کونفرانسێن ناڤخۆ یێن پارتی دیمۆکراتی کوردستان دەستپێبکەن و هیوا گەیلانی، ئەندامێ سەرکردایەتییا پارتی ب رێکا مالپەڕێ فەرمی یێ پارتی راگەهاند: د ڤان کونفرانسان دا گوهۆڕینێن گرنگ دێ هێنە کرن و زێدەباری کو هەموو کادران دەرفەت هەیە خۆ بیننە پێش، ژنان دەلیڤەیەکا باش هەیە خۆ دیاربکەن و رۆلەکێ زێدەتر وەربگرن.

هەر دەربارەی کونفرانسێن پارتی، دیاری حسێن، هاریکارێ بەرپرسێ مەکتەبا رێکخستنا پارتی ل سلێمانییێ دبێژیت: هەموو ئامادەکاری بۆ دەستپێکرنا کونفرانسان هاتینە کرن و سەرۆک مەسعوود بارزانی دێ سەرپەرشتییا ئێکسەر یا کونفرانسی کەت.

بریارە سوبەهی سپێدێ ل دەستپێکێ ل بنکە و رێکخراوێن پارتی، پاشی ل لژنەیان، پاشی ل لقان و د دویڤ دا ل مەکتەبێن رێکخستنێ دەنگدان بهێتە کرن و ل گۆرەی وێ دەنگدانێ، دێ کادرێن نوی چنە د ناڤ رێزێن پارتی دا و هەروەسا بەرپرسێن رێکخراوێن پارتی دێ هێنە دانان و کارگێر و بەرپرسێن لژنەیان دێ هێنە دیارکرن و کارگێرێن لق و مەکتەبێن رێکخستنان ژی دێ هێنە هەلبژارتن.