وهزيرێ دهرڤه يێ ئيراقێ ل گهل شاندهكێ ئهمريكى كۆمبوو
گاڤ نيوز
وهزيرێ دهرڤه يێ ئيراقێ تهكهزى ل سهر وێ چهندێ كر كو ئيراقێ دڤێت پهيوهنديێن ڤهكرى ل گهل ههمى وهلاتان ههبيت.
د. فوئاد حسێن ئهڤرۆ ئێكشهمبيێ د چارچووڤهيێ كۆمبوونێن دانوستاندنێن مهنامه دا ل بهحرێن ل گهل شاندهكێ ئهمريكى ب سهركێشيا باربارا ليف هاريكاريا وهزيرێ دهرڤه بۆ كاروبارێن رۆژههلاتا نزيك و برێت ماكگۆرك رێكخهرێ كۆچكا سپى بۆ كاروبارێن رۆژههلاتا ناڤين و باكۆرێ ئهفريقيا كۆمبوو و ههردو لايان تهكهزى ل سهر پێشڤهبرنا پهيوهنديێن ئيراقێ و ئهمريكا كرن.
د بهيانهكا وهزارهتا دهرڤه يا ئيراقێ دا هاتيه؛ فوئاد حسێن جێگرێ سهرۆكوهزيرێ ئيراقێ و وهزيرێ دهرڤه تهكهزى ل سهر وێ چهندێ كر كو ئاخا ئيراقى نهبيته دهرازينكهك بۆ گهفان ل سهر وهلاتێن دهوروبهرێ ئيراقێ و تهكهزى ل سهر گرنگيا دانوستاندنێ ژ بۆ بهرسينگگرتنا ئالنگاريان و ب تايبهت يێن ئهمنى كر.
وهزيرێ دهرڤه يێ ئيراقێ راگههاند ژى؛ ئيراق بهرهڤ پهيوهنديێن ڤهكرى ل گهل ههمى وهلاتان و ب تايبهت وهلاتێن كهنداڤى دچيت ههروهسا كار ل سهر پێكئينانا پهيوهنديان ل سهر بنياتێ بهرژهوهنديێن ههڤپشك ل گهل ههمى وهلاتان دكهت.