گاڤ - تایبەت
ژبەربرنا زارۆیان ژلایێ ژنان ڤە ل پارێزگەها دهۆکێ و ئیدارەیا سەربەخۆ یا زاخۆ بەرەڤ زێدەبوونێ یە و پارێزەرەک هوشداریێ ددەت و دبێژیت: ژن د پشت یاسا و شەریعەتى را پەنایێ بۆ ژبەربرنا زارۆیان دبەن.
ل کۆلیژا نوشدارى یا زانکۆیا زاخۆ کۆنفرانسەکێ تایبەت ب ژبەربرنا زارۆیان ژلایێ ژنان ڤە ژ روویێ قانوونى و ئایینى و نوشدارى ڤە هاتە برێڤەبرن، پارێزەر هەلات حەسەن بۆ گاڤ گۆت: بێى بریارا لژنەیەکا تایبەتمەند یا نوشدارى، قانوون ب چ رەنگان رێ نادەت ژن زارۆی ژبەرخۆ ببەت، بەرۆڤاژى ل گۆرەى قانوونێن 417 و 418، دێ ژن ب سالەکا زیندانێ هێتە سزادان و سزایێن ماددى ژى هانە.
گۆت ژى: ژن د پشت یاسا و شەریعەتى را پەنایێ بۆ ژبەربرنا زارۆیان دبەن و حالەت هەنە کو ب زورى ژلایێ کەسوکاران یان زەلامى ڤە ژن تووشى ژبەربرنا زارۆیی ببیت، بۆ ڤێ ژى قانوونێ تا 10 سالێن زیندانێ دیارکرینە.
هەڤدەم مەلا ناتق ئاکرەیی، ماموستایێ ئایینى بۆ گاڤ دبێژیت: ل دیف ئایینێ ئیسلامێ، ب چ رەنگان نابیت زارۆیێ 4 هەیڤى و پتر بهێتە دەرێخستن و دبیتە کوشتن، هندەک حالەتێن تایبەت هەنە کو پێدڤییە نوشدار دیار بکەت کو ژن یا پێدڤییە زارۆی ژبەر خۆ ببەت، بەرۆڤاژى حەرامە و رێ ناهێتەدان.