لوقمان ئاسیهى

قەومى و چوو، بەس جارێ ئەم دشێن بێژن هندە و خلاس بدویماهی هات؟! ئەز ب خوە وەک بەرسڤ دێ بیژم: ئەگەر رەوش ب ئەڤی دەستودارى بت و پشتى تشت بقەومت ژنوى ئەم بهێن دانین سەرێن خوە ب تەپا و رۆژێن ماتەمینى دەینین، ئەز دبێژم (خودێ نەکت ئیشەلا) بەس روودان و بوویەرێن کەمباختر و وێرانتر د رێدەنە.

ل من نەگرن، بەس وە راستى دڤێت ئەڤە ئەو تانکا غازێ ل دهۆکێ پەقى، سەرێ من یێ تژى گۆمان بووى، ئاخر قەت نە بەرئاقلە د ماوەیێ دەردۆرێن ئێک حەفتییێ دە دو بوویەرێن هەمان رەنگ هەمان سیناریۆ ل دو جهێن جودایێن کوردستانێ رووبدن و چەندین قوربانییان ل پەى خوە بهێلن و ژ ڤالاتییەکێ هاتبت!! هەما هۆ ب کورتى دێ بێژم؛ ئەڤ روودانە ئنیەتێن پیس و ب ترس دپشت رە هەنە، چ و چاوا و بۆچى؟ ئەز ناچمە وان هوورهوورکان چونکى هوین هەمی دزانن کا مایتێكرنا وەلاتێن دەورۆبەرا چەند دناڤا مە دە درێژ بووینە ژبلى هەڤڕکییێن هرڤە و هۆڤە و ... .

 پاشى دێ بێژم؛ ئەگەر وەسا ژى نەبت وەکى من ل سەری بەحسکرى و ب راستا پەقین پەقینا تانکێن غازێ بت، هینگێ ل ڤێرێ ژى پرسیارەکا دى دئێتە رۆژەڤێ: ئەرێ گەلۆ ما ئەڤ سیستەمە ل دەف مە ب تنێ هەیە؟ ئەرێ ما نە وەکى سیستەمەکێ هۆسا دئێتە دانان وی ژى بسپۆر و ئەندەزیارێن خوە هەنە و پێدڤییە هەر چەند هەیامەکان بهێنە پشکنینکرن و سەخبێرکرن؟ هەروەسا پێدڤییە رەنگە مۆلەتەکێ ژى ژ جهەکێ تایبەتمەند وەربگرن داکو بشێن ب رەنگەکێ زانستى و ته‌ئمینکرى دانت، یان ژى ل دەف مە گەر تە پێچێبوو هەما لەزکە و تانکەکێ تژژژژى غاز دانە سەربانى و هزرا هرڤە و هۆڤە نەکە و ب هیڤیا خودێ ڤە؟!

ئەڤە ژى چونە، جارێ دێ بێژم قەومى و چوو، بەس هوین و خودێ چەند جارا وە د تەلەڤژیۆنان دە دیتییە وەکى روودانەک ل جهەکێ چێدبت، ئالییێن پەیوەندیدار بلەز و بەز وەک ئێکەم پێنگاڤ وی جهى ب هندەک تیتکێن (شریط)ێن رەنگین عەزلدکن و خەلکى ژێ دووردئێخن، بەس بۆچى ل دەف مە ئەو ئالیی وێ پێنگاڤێ نا هاڤێن و بۆچى خەلکێ مە ژى وەکو دەهوەتێ ل دۆر وێ بەلایێ کۆمدبت؟ یا ژ منڤە ئەگەر ئەڤ خال پشتى تەقینا ئێکێ هاتبا بجهئینان، ل تەقینا دوێ موصیبەت ب ئەڤی رەنگى نە دبوو!

ب هەر حال خودێ ب رحما خوە دگەل وەغەرکریا بکت و شیفایێ بۆ بریندارا بهنێرت، بەس ل دوماهیێ دێ بێژم هەر تشتێ ب سەرێ مە دهێت ژ خەمسارى و نەزانینا مە یە و ئەڤە هەر دو ژى موصیبەتێن مەزنن!!