پۆل بریمهری نهێنیێن پشتى شهڕێ رزگاركرنا ئیراقێ ئاشكرا كرن
گاڤ
حاکمێ بهرێ یێ مەدەنی یێ ئەمریکا ل ئیراقێ ههڤدهم ل گهل سالڤهگهڕا 20 یا دهستپێكرنا شهڕێ ههڤپهیمانان ل سهر رژێما ئیراقێ یا بهرێ هندهك رۆنكرن دان و ئاشكرا كر كو ههلوهشاندنا سوپایێ ئیراقێ پشتى كهفتنا رژێما سهدامى ل سهر داخوازیا كوردان بوو.
د رۆژهكا وهكى ئهڤرۆ دا ل 19/3/2003 شهڕێ ههڤپهیمانان ل سهر رژێما بهرێ یا ئیراقێ ب سهركردایهتیا ئهمریكا و بریتانیا و ب پشكداریا ژمارهیهكا وهلاتان دهستپێكربوو و ل 9/4/2003 رژێما سهدامى هاتبوو ئێخستن.
"بڕیارا جۆرج بۆشى ب ئێخستنا رژێما سهدامى یا دروست بوو"
پۆل بریمهر د چاڤپێكهفتنهكێ دا ئهڤرۆ ئێكشهمبیێ ل گهل رۆژنامهیا ئهلشهرق ئهلئهوسهت دیاركر؛ بڕیارا جۆرج بۆش سهرۆكێ ئهمریكا ب ئێخستنا رژێما سهدام حسێنى یا دروست بوو.
گۆت ژى "ئهگهر رژێما سهدامى مابا، دا ئیراقهكا چهكێ ئهتۆمى ههى ل بهرانبهر ئیرانهكا چهكێ ئهتۆمى ههى ههبیت و رێككهفتنا راوهستاندنا پرۆگرامێ ئهتۆمى یێ ئیرانێ كو د سهردهمێ باراك ئۆباماى دا بوو روینهددا و دا دهڤهر ژ نهسهقامگیریێ ژ بهر ههبوونا دو هێزێن ناڤۆكى نالیت".
خۆیا ژى كر؛ رهوشا ئیراقیان پشتى 20 سالان ژ شهڕى ژ رهوشا وان د سهردهمێ رژێما بهرێ دا باشتره و ئیراقى ئێدى دشێن حكومهتا وان بڤێت، بههلبژێرن.
"ههلوهشاندنا سوپایێ ئیراقێ ل سهر داخوازیا كوردان بوو"
بريمهرى ههروهسا ئاماژه دا ئهگهرێن ل پشت ههلوهشاندنا سوپایێ ئیراقێ پشتى ئێخستنا رژێما سهدامى ل سالا 2003.
ل دۆر بڕیارا ههلوهشاندنا سوپایێ ئیراقێ پشتى ئێخستتا رژێما سهدامى ئاشكرا كر؛ ههلوهشاندنا سوپایێ ئیراقێ سهرهراى كو شاشى بوو لێ یا پێدڤى بوو و پێدڤیاتیا ههلوهشاندنا سوپاى گهلهك ژ یا مانا سوپاى پتر بوو چونكى كوردان نهدڤیا سوپایێ ئیراقێ دوباره بمینیت چونكى وان ددیت كو ئهو سوپایه هێزهكا وێرانكهر بوو.
ئاشكرا ژى كر؛ كورد دا جودابوونێ راگههینن ئهگهر سوپایێ ئیراقێ پشتى ئێخستنا رژێمێ نههاتبا ههلوهشاندن.
دهستكهفتیێن شهڕى
سهرۆكێ دهستههلاتا دهمكى یا بهرێ یا ههڤپهیمانان ل ئیراقێ د درێژیا چاڤپێكهفتنێ دا تیشك ئێخسته سهر دانا بڕیارا شهڕێ و دهستكهفتیێن پشتى شهڕى.
ل دۆر كۆدهنگیێ ل ئهمریكا سهبارهت شهڕى خۆیاكر؛ بڕیار نه ب تنێ یا جۆرج بۆشى بوو بهلكو پتریا سیاسیان و ب رێژهیهكا مهزن چ ژ جڤاتا نوینهران یان جڤاتا پیران ل سهر دهستپێكرنا شهڕێ رازیببوون.
شهرق ئهلئهوسهت ژ بریمهر پرسى، ئهرێ ئهوا ل ئیراقێ پشتى ئێخستنا رژێمێ چێبووى شهڕێ ناڤخۆیى بوو؟ بریمهر د بهرسڤێ دا دیاركر؛ نه شهڕێ ناڤخۆیى بوو، بهلكو ب دیاربوونا قاعیده، وان دڤیا شهڕێ ناڤخۆیى دناڤبهرا سونه و شیعهیان دا دروست بكهن، ل دهسپێكێ هێرش ل سهر بنگههێ نهتهوهیێن ئێكگرتى هاته كرن و تێدا سێرجیۆ دى میلۆ گیانێ خۆ ژدهستدا و پاشى ل 30/8/2003 هێرشهك ل سهر مزگهفتهكا شیعهیان هاته كرن و تێدا ب سهدان كهسان گیانێ خۆ ژدهستدا.
ل دۆر دهستكهفتیێن شهڕێ ل ئیراقێ ئاماژه دا وێ چهندێ "پشتى سالهك و نیڤان ژ رزگاركرنا ئیراقێ، ل سالا 2005 ئیراقیان ههلبژارتن ئهنجامدان و راپرسین ل سهر دهستوورى كرن".
زێده ژى كر: ههر ژ دهمێ ب دویماهیك هاتنا دهستههلاتداریا مه، ئیراقیان شهش جاران ڤهگوهاستنا ئاشتیانه بۆ دهستههلاتێ ئهنجامداینه و چ وهلاتێن عهرهبى ئهڤ چهنده ئهنجامنهداینه.
سهبارهت گهندهلیێ ل ئیراقێ گۆت "ب مخابنى ڤه، ئیراق ئهڤرۆ ب شێوهیهكێ مهزن ژ گهندهلیێ دنالیت، چ گۆمان ل سهر ڤێ چهندێ نینن".