گرنگیا پشكداریا سه‌رۆك نێچیرڤان بارزانى د كۆربه‌ندێ ئه‌نتالیا یێ دپلۆماسى دا
بەلاڤ بکە
گاڤ
كۆربه‌ندێ ئه‌نتالیا یێ دپلۆماسى یێ سیێ ب پشكداریا سه‌رۆك نێچیرڤان بارزانى و پتر ژ 20 سه‌رۆك و سه‌رۆكوه‌زیرێن وه‌لاتان و 90 وه‌زیران برێڤه‌دچیت و دهێته پێشبینیكرن پشكداریا سه‌رۆكێ هه‌رێمێ د كۆربه‌نده‌كێ ژ ڤى جۆرى دا گرنگیا خۆ بۆ هه‌رێما كوردستانێ و پاشه‌رۆژا وێ هه‌بیت.
كۆربه‌ندێ ئه‌نتالیا یێ دپلۆماسى
كۆربه‌ندێ ئه‌نتالیا یێ دپلۆماسى یێ سیێ ل رۆژا ئه‌ینیێ 1ى ئادارێ ده‌ستپێكر و دێ هه‌تا سوبه‌هى 3ى ئادارێ ل ویلایه‌تا ئه‌نتالیا ل باشوورێ توركیا به‌رده‌وام بیت.
كۆربه‌ندێ ئه‌نتالیا یێ دپلۆماسى یێ ئێكێ ل رۆژا 18 هه‌تا 20ى خزیرانا سالا 2021 برێڤه‌چووبوو و كۆربه‌ندێ دوێ ل رۆژا 11 هه‌تا 13ى ئادارا سالا 2022 برێڤه‌چووبوو، ل سالا 2023 ژ به‌ر هه‌ردو ئه‌ردهه‌ژێن ل مه‌ره‌شێ ل توركیا داین كۆربه‌ند نه‌هاتبوو گێڕان.
ئاژانسا ئه‌نادۆل دیاركریه؛ د كۆربه‌ندێ ئه‌ڤ ساله دا ژماره‌یه‌كا كێشه‌یێن جیهانى و هه‌رێمایه‌تى دهێنه به‌حسكرن وه‌كى گوهۆڕینێن سه‌قاى، قه‌یرانا خۆراكى و كێشه‌یا غه‌زه و ژماره‌یه‌كا ته‌وه‌رێن دى.
خۆیا ژى كریه؛ د كۆربه‌ندێ ئه‌ڤ ساله دا، پتر ژ 20 سه‌رۆك و سه‌رۆكوه‌زیرێن وه‌لاتان و 90 وه‌زیر كو 60 ژ وان وه‌زیرێن ده‌رڤه نه ژ پتر ژ 100 وه‌لاتان پشكدارن.
ئاماژه ب وێ چه‌ندێ ژى كریه "هه‌روه‌سا نوینه‌رێن نزیكى 80 رێكخراوێن نێڤده‌وله‌تى زێده‌بارى نزیكى 4 هزار مێهڤانان د كۆربه‌ندى دا پشكدارن كو دێ پتر ژ 50 روینشتنان تێدا هه‌بن".
بابه‌تێن د كۆربه‌ندى دا دهێنه به‌حسكرن
ژماره‌یه‌كا بابه‌تێن گرێداى ئێمناهیێ، سیاسه‌تێ و دپلۆماسیێ د كۆربه‌ندێ ئه‌نتالیا دا دهێنه به‌حسكرن.
كۆربه‌ندێ سیێ یێ دپلۆماسى یێ ئه‌نتالیا ل بن ناڤێ ’تیشك خستنه سه‌ر دپلۆماسیێ د ده‌مێن قه‌یرانان دا’ ل ئه‌نتالیا برێڤه‌دچیت.
ره‌وشا غه‌زه و شه‌ڕێ ئسرائیلێ و حه‌ماس، ره‌وشا سووریا و ئێمناهیێ ل ده‌ڤه‌رێن جودا جودا یێن جیهانێ ژ ته‌وه‌رێن سه‌ره‌كى یێن كۆربه‌ندى نه.
هه‌روه‌سا رۆلێ دپلۆماسیێ د چاره‌كرنا هه‌ڤڕكیان دا و به‌رقه‌راركرنا ئاشتیێ ژ ته‌وه‌رێن سه‌ره‌كى یێن كۆربه‌ندى نه.
ژماره‌یه‌كا كێشه‌یێن جیهانى یێن گرێداى رۆژهه‌لاتا ناڤین، ده‌ڤه‌را زه‌ریایا ئارام و ئه‌فریكا و ئه‌مریكا باشوور هه‌روه‌سا كێشه‌یێن وه‌كى گوهۆڕینێن سه‌قاى ژى دهێنه به‌حسكرن.
ژماره‌یه‌كا سه‌رۆك و سه‌رۆكوه‌زیر و وه‌زیرێن وه‌لاتان و رێڤه‌به‌رێن رێكخراوێن جیهانى پشكداریێ د په‌نه‌لێن كۆربه‌ندى دا دكه‌ن زێده‌بارى دیدارێن دوقولى یێن د په‌راوێزا كۆربه‌ندى دا دهێنه ئه‌نجامدان.
گرنگیا پشكداریا سه‌رۆكێ هه‌رێما كوردستانێ د كۆربه‌ندى دا
پشكداریا سه‌رۆكێ هه‌رێما كوردستانێ د كۆربه‌ندێ دپلۆماسى یێ ئه‌نتالیا یێ سیێ دا و د دیدارێن وى ل گه‌ل ژماره‌یه‌كا سه‌ركرده و به‌رپرسان گرنگیا خۆ هه‌یه.
د. رێبین سه‌لام مامۆستایێ زانكۆیێ ل دۆر پشكداریا سه‌رۆك نێچیرڤان بارزانى د كۆربه‌ندێ دپلۆماسى یێ ئه‌نتالیا دا بۆ گاڤ دیاركر "پشكدارى د ڤان كۆربه‌ندان دا رامانا وێ ئه‌وه وه‌ك ده‌وله‌ته‌كێ دانپێدان ب هه‌رێما كوردستانێ دهێته كرن".
گۆت ژى "یا ژ هه‌میان گرنگتر ته‌وه‌رێن كۆربه‌ندى نه كو به‌حسكرنا بابه‌تێن د كۆربه‌ندى دا ژ بۆ هه‌رێما كوردستانێ یا گرنگه زێده‌بارى ڤێ چه‌ندێ به‌رنامه‌یه‌كێ چڕ و پڕ بۆ سه‌رۆكێ هه‌رێمێ ژ بۆ ئه‌نجامدانا دیدارێن دوقولى هاتیه دانان".
ژ لایێ خۆڤه، جه‌واد قادر نڤیسه‌ر و رۆژنامه‌ڤان بۆ گاڤ گۆت "پشكداریا سه‌رۆك نێچیرڤان بارزانى د كۆربه‌ندى دا درێژه‌پێدانه ب وان بزاڤێن دپلۆماسى یێن هه‌یى و یێن سالێن بۆرى".
زێده‌تر ژى گۆت "سه‌رۆك نێچیرڤان بارزانى د 21 سالێن بۆرى دا شیایه په‌یوه‌ندیێن باش ل گه‌ل وه‌لاتێن جیران و وه‌لاتێن ده‌ڤه‌رێ و وه‌لاتێن كارتێكه‌ر یێن سیسته‌مێ نێڤده‌وله‌تى و ئێكه‌تیا ئه‌ورۆپى دروست بكه‌ت".
ناڤهاتى ئاماژه ب وێ چه‌ندێ ژى كر "سه‌رۆك نێچیرڤان بارزانى مێژوویه‌ك د ناڤبه‌ینكاریا دپلۆماسى دا هه‌یه وه‌كى دناڤبه‌را توركیا و وه‌لاتێن كه‌نداڤى دا هه‌روه‌سا دناڤبه‌را ئه‌رمینیا و ئازه‌ربایجانێ دا"
بزاڤێن دپلۆماسى
سه‌رۆك نێچیرڤان بارزانى د رۆژێن ئێكێ و دوێ یێن كۆربه‌ندى دا ژماره‌یه‌كا دیدارێن گرنگ ل گه‌ل سه‌ركرده و به‌رپرسێن جیهانى ئه‌نجامداینه.
نێچیرڤان بارزانى سه‌رۆكێ هه‌رێما كوردستانێ دوهى ئه‌ینیێ د رۆژا ئێكێ یا كۆربه‌ندى دا ل گه‌ل ره‌جه‌ب ته‌یب ئه‌ردۆگان سه‌رۆككۆمارێ توركیا كۆمببوو، سه‌رۆك نێچیرڤان بارزانى ل دۆر كۆمبوونێ دیاركربوو "خۆشحالم ب دیدارا ل گه‌ل سه‌رۆك ئه‌ردۆگانى ئه‌ڤ شه‌ڤه ل ئه‌نتالیا، مه بیروبۆچوون ل دۆر دویماهیك پێشهاتان، بهێزكرنا هه‌ڤكاریا ئابوورى دناڤبه‌را ئیراقێ و هه‌رێما كوردستانێ ل گه‌ل توركیا دا و بهێزكرنا سه‌قامگیریا هه‌رێمایه‌تى لێكگوهارتن".
سه‌رۆكاتیا هه‌رێمێ ژى ل دۆر كۆمبوونێ دیاركربوو "د كۆمبوونه‌كێ دا، هه‌ردو لایان ل دۆر پێشڤه‌برنا په‌یوه‌ندیان و هاریكاریا هه‌ڤپشك یا توركیا ل گه‌ل ئیراقێ و هه‌رێما كوردستانێ و ب تایبه‌تى د بوارێن بازرگانى و ئابوورى دا هه‌روه‌سا ده‌رباره‌ى ره‌وشا سیاسى و ئه‌منى یا ئیراقێ و هه‌رێما كوردستانێ بیروبۆچوون لێكگوهۆڕین، هه‌ردو لایان به‌حس ل ئه‌گه‌ر و ده‌رئه‌نجامێن ره‌وشا ئالۆز یا ده‌ڤه‌رێ و پێشهاتێن شه‌ڕی ل غه‌زه كرن، هه‌روه‌سا دوپاتى ل سه‌ر گرنگیا بزاڤ و هاریكاریێن فڕه‌لایه‌نى بۆ چاره‌سه‌ركرنا ئاشتیانه یا كێشه‌یان ب دانوستاندنێ و رێكێن دپلۆماسى كرن، مه‌ترسیێن تیرۆرێ و چه‌ند پرسێن جهێ گرنگیپێدانا هه‌ڤپشك ته‌وه‌ره‌كێ دی یێ كۆمبوونێ بوون".
هه‌ر د كۆربه‌ندى دا، نێچیرڤان بارزانى سه‌رۆكێ هه‌رێما كوردستانێ ئه‌ڤرۆ شه‌مبیێ ل گه‌ل رۆمێن رادێڤ سه‌رۆكێ بولگاریا كۆمبوو، سه‌رۆكاتیا هه‌رێمێ ل دۆر كۆمبوونێ راگه‌هاند "دوپاتى ل سه‌ر پێشڤه‌برنا په‌یوه‌ندیێن بولگاریا ل گه‌ل ئیراقێ و هه‌رێما كوردستانێ د بوارێن ئابوورى، بازرگانى، كه‌لتۆرى، وه‌رزشى، گه‌شتیارى و چاندنێ دا هاته كرن، سه‌رۆك نێچیرڤان بارزانى ئاماژه دا حه‌زا هه‌رێما كوردستانێ بۆ به‌رفره‌هكرنا بوارێن هاریكاریا هه‌ڤپشك ل گه‌ل بولگاریا و داخواز كر بولگاریا ئاستێ نوینه‌رایه‌تیا خۆ ل هه‌رێما كوردستانێ بلند بكه‌ت".
هه‌روه‌سا سه‌رۆك نێچیرڤان بارزانى د دیداره‌كێ دا ل گه‌ل یاشار گوله‌ر وه‌زیرێ به‌رگریێ یێ توركیا دویماهیك پێشهاتێن ئه‌منى یێن رۆژهه‌لاتا ناڤه‌راست و مه‌ترسى و گه‌فێن تیرۆرێ به‌حسكرن، ل گۆره‌ى به‌یانه‌كا سه‌رۆكاتیا هه‌رێمێ "هه‌ردو لایه‌ن ل سه‌ر گرنگیا پاراستنا ئارامى و سه‌قامگیریا ده‌ڤه‌رێ و بزاڤكرنێ بۆ رێگریێ ل به‌رفره‌هبوونا ئالۆزیان د هه‌ڤرا بوون هه‌روه‌سا دوپاتى ل سه‌ر پێشڤه‌برنا په‌یوه‌ندیێن توركیا ل گه‌ل ئیراقێ و هه‌رێما كوردستانێ كرن".
