ئه‌ڤرۆ كلاسیكۆیه جاره‌كادى بارسێلۆنا و ریال مه‌درید روى ب روى ئێك دبن
بەلاڤ بکە
گاڤ
ئه‌ڤرۆ جاره‌كادى یانه‌یێن بارسێلۆنا و ریال مه‌درید دێ روى ب روى ئێك بن و ئالیگرێن وان جیهان بۆ دو به‌ره‌یان دابه‌شكریه.
ئه‌ڤرۆ ده‌مژمێر پێنج و چارێكه‌كی ئێڤاری یانەیا بارسێلۆنا د هه‌ڤڕكیێن گەڕا 11ـێ یا لالیگایێ دا دێ مێهڤانداریا یانه‌یا ریال مەدرید هه‌ڤڕكا خۆ یا هه‌روهه‌ر كه‌ت.
هه‌ردو یانه‌یان دویماهى مه‌شقێن خۆ ئه‌نجامداینه، سه‌رجه‌م یاریكه‌رێن ریال مه‌درید ژ بلى تیبۆ کۆرتواى، ئیدێر میلیتاوى، ئاردا گولەرى و دانی سێبایۆسى، بۆ یاریا گۆپیتكێ دئاماده‌نه، کارلۆ ئەنچێلۆتی دخوازیت دریژیێ ب ئه‌نجامێن خۆ یێن باش بده‌ت و جاره‌كادى پێشه‌نگیا رێزبه‌ندیا خولێ ژ یانه‌یا خیرۆنا وه‌ربگریت و ژ بارسێلۆنا ژى دویربكه‌ڤیت.
ل همبه‌ر ژى یانه‌یا بارسێلۆنا یا خودانا یاریگه‌رهێ نوچه‌یێن خۆش بۆ یاریێ هه‌نه ژبه‌ركو، هه‌ر ئێك ژ یاریكه‌ران رۆبێرت لیڤاندۆڤسکی، فرێنکی دییۆنگ، رافینیا، پێدری و کۆندێ پشكدارى مه‌شقان بووینه، لێ ل گۆره‌ى میدیایێن ئسپانى پێدری و کۆندێ ئاماده‌ى یاریێ نابن.
د دیرۆكا هه‌ردو یانه‌یان دا، د سه‌رجه‌م خول و پاله‌وانییان دا 296 یارى دناڤبه‌را هه‌ردو یانەیێن ریال مه‌درید و بارسێلۆنا دا هاتینه كرن، بارسێلۆنا بالاده‌سته و 124 سه‌ركه‌فتن بده‌ستڤه‌ئیناینه، ریال مه‌درید 108 سه‌ركه‌فتن ئیناینه، د 64 یاریان ژى دا وه‌كهه‌ڤبووینه.
