توركیا بڕیار دا وه‌لاتیێن شه‌ش وه‌لاتان بێى ڤیزه سه‌ره‌دانا وێ بكه‌ن
بەلاڤ بکە
گاڤ
توركیا بڕیار دا ئێدى وه‌لاتیێن شه‌ش وه‌لاتان ژ وان ژى ژماره‌یه‌كا وه‌لاتێن كه‌نداڤێ عه‌ره‌بى نه بۆ سه‌ره‌دانا توركیا وه‌ك گه‌شتیار پێدڤى ب وه‌رگرتنا ڤیزه‌یێ نابن.
ل گۆره‌ى بڕیاره‌كا سه‌رۆكاتیا توركیا كو د رۆژنامه‌یا فه‌رمى دا هاتیه به‌لاڤكرن، ئه‌و وه‌لاتێن خه‌لكێ وان پێدڤى ب وه‌رگرتنا ڤیزه‌یا توركیا بۆ سه‌ره‌دانێ نابن ئه‌ڤه‌نه: سعوودیه، ئیمارات، عومان، به‌حرێن، ئه‌مریكا و كه‌نه‌دا.
ل گۆره‌ى وێ بڕیارا ره‌جه‌ب ته‌یب ئه‌ردۆگان سه‌رۆكێ توركیا ئیمزاكرى، وه‌لاتیێن وان شه‌ش وه‌لاتان دشێن بۆ ده‌مێ 90 هه‌تا 180 رۆژان ل توركیا بمینن بێى پێدڤى وه‌رگرتنا ڤیزه‌یێ ببن.
توركیا ل سالا 2016 بڕیارا لێبۆرینێ بۆ وه‌لاتیێن قه‌ته‌رێ ژ وه‌رگرتنا ڤیزه‌یێ دابوو، هه‌روه‌سا ل سالا 2017 هه‌مان بڕیار بۆ كوێتێ ده‌ركربوو.
توركیا ل رێزا شه‌شێ ل سه‌ر ئاستێ جیهانێ بۆ پێشوازیێ ل گه‌شتیاران دهێت، ل گۆره‌ى رێكخراوا گه‌شتیاریێ یا جیهانى ل سالا 2019ێ 52.5 ملیۆن گه‌شتیاران سه‌ره‌دانا توركیا كربوون.
وه‌زاره‌تا ره‌وشه‌نبیرى و گه‌شتوگۆزارێ یا توركى دوهى ئه‌ینیێ راگه‌هاند بوو كو د 11 هه‌یڤێن ده‌ستپێكێ یێن ئه‌ڤ ساله 2023 دا، 52 ملیۆن و 742 هزار و 526 گه‌شتیاران سه‌ره‌دانا توركیا كربوون.
