جه‌مال كۆچه‌ر: سودانى بڕیار دا لژنه‌یه‌ك بۆ چاره‌كرنا كێشه‌یا موچه‌یێن فه‌رمانبه‌رێن هه‌رێمێ بهێته پێكئینان
بەلاڤ بکە
جه‌مال كۆچه‌ر، ئه‌ندامێ لژنه‌یا دارایی ل په‌رله‌مانێ ئیراقێ بۆ گاڤ دا زانین، ب بڕیارا سه‌رۆكوه‌زیرێن ئیراقێ لژنه‌یه‌ك هاتیه پێكئینان بۆ چاره‌كرنا كێشه‌یا موچه‌یێ فه‌رمانبه‌رێن هه‌رێما كوردستانێ و كێشه‌یا پاره‌یێ كۆمپانیێن پترۆلا هه‌رێمێ، گۆت ژى چاڤه‌رێ یه ل هه‌فتیا بهێت ئه‌و لژنه ده‌ست بكار ببیت.
جه‌مال كۆچه‌ر دا زانین، ئه‌و لژنه كو ژ ئه‌ندامێن لژنه‌یا دارایی یا ئیراقێ و شیره‌تكارێن حكومه‌تێن ئیراقێ و هه‌رێمێ پێكهاتیه، بۆ رێكخستن و راستڤه‌كرنا یاسایا بودجه‌یێ یه و دێ پێداچوونێ د دۆسیه‌یا موچه‌یێ فه‌رمانبه‌رێن هه‌رێمێ دا كه‌ت. گۆت ژى، ئه‌و پێشبینى دكه‌ت ل هه‌فتیا بهێت لژنه‌یا پێداچوونا بودجه‌یێ ده‌ست ب كار ببیت.
وى ئه‌ندامێ لژنه‌یا دارایی یا په‌ڕله‌مانێ ئیراقێ ل دۆر چه‌وانیا چاره‌كرنا كێشه‌یا موچه‌یێن فه‌رمانبه‌رێن هه‌رمێ گۆت: راستڤه‌كرنا ماده‌یێن تایبه‌ت ب موچه‌یێ فه‌رمانبه‌رێن هه‌رێمێ د یاسایا بودجه‌یا ئیراقێ دا دێ ب دو رێكان بیت، یا ئێكێ موچه‌یێ فه‌رمانبه‌رێن هه‌رێمێ ژ خه‌رجیێن فعلى بۆ خه‌رجیێن حاكیمه بهێته ڤه‌گوهاستن، یا دى ژى تێچوویا به‌رهه‌مئینانا پترۆلا هه‌رێمێ و ته‌رخانكرنا پاره‌یه بۆ كۆمپانیێن به‌رهه‌مئینانا پترۆلێ.
دا زانین ژى راستڤه‌كرن دێ بۆ یاسایا بودجه‌یا سالا 2023ێ بیت و ئه‌گه‌ر هاته راستڤه‌كرن دێ د یاسایا بودجه‌یا سالا 2024ێ ژى دا هێته جهگیركرن.
