جیهانێ سالهكا نوى دهستپێكر
گاڤ
ل سهرانسهرى جیهانێ ب چهندین شێوازان پێشهوازى ل سالا نوى 2024ێ هاته كرن، ل ههرێما كوردستانێ ژى ب هێرشێن فرۆكهیێن بێفرۆكهڤان سالا نوى دهستپێكر، لێ هێرش نهبوونه رێگر وهلاتیێن ههرێمێ ئاههنگێن سهرێ سالێ نهگێرن. ههروهسا وهلاتى دخوازن ل سالا نوى كێشه و قهیرانێن سالا بۆرى ب دویماهى بهێن ب تایبهتى كێشهیا موچهى.
سالا 2023ێ ل جیهانێ ب سالهكا نهخۆش هاته دیاركرن ژبهر وان رویدان و ئالۆزیێن تێدا رووداین و وهلاتیێن جهیانێ دخوازن سالا نوى نهخۆشیێن سالا بۆرى ب دویماهى بینیت.
ل سالا بۆرى تركیا و باكوری كوردستانێ و سووریا و رۆژئاڤایێ كوردستانێ ژبهر بیڤهلهرزهكا مهزن دههان هزار كهسان گیانێ خۆ ژ دهستدا و سهدان هار ژى برینداربوون و دههان باژێر و ناوچه كاڤل بوون.
ههروهسا لههى و بارۆڤه ل گهلهك وهلاتان چێبوون، ب تایبهتى لههیین لیبیا و ههرفینا بهنداڤهكێ، ههروهسا رویدانێن مهزن یێن ئاگربهربوونێ ل گهلهك وهلاتان چێبوون ب تیابهتى ل یۆنان و ئهمریكا.
ژ ئالیهكێ دیڤه شهڕێ ئۆكراینا بهردهوام بوو،ل سودانێ شهڕێ ناڤخۆیی و ئالۆزیان دهستیێكر. ههڤدهم شهڕێ تهڤگهڕا حهماس و ئسرائیلێ ژى هاته سهر و تا نها بهردهوامه كو ب خویناویترین رویدانا سالا بۆرى دهێته هژمارتن.
سالا بۆرى بۆ وهلاتیێن ههرێما كوردستانێ ژى سالا قهیران و كێشهیان بوو، سهربارى گیرۆكرنا موچهیێ فهرمانبهرێن ههرێمێ چارهنڤیسێ 3 مووچهیان ژى نه دیاره و نههاتینه دان، ههروهسا دههان هێرش بۆ سهر ناوچهیێن جودایێن ههرێمێ ژ لایێ تركیا و گرۆپێن چهكدارێن سهر ب حهشدا شهعبیڤه هاتنه كرن.
دوهى دویماهى رۆژا سالا بۆرى ژى ب فرۆكهیێن بێفرۆكهڤان هێرش ههولێرا پایتهخت هاته كرن و بارهگهههكێ پێشمهرگهى ژى بوو ئارمانجا هێرشان، ههڤدهم داخۆیانیێن ههردو حكومهتێن ههرێما كوردستانێ و ئیراقێ د دویماهى رۆژا سالا بۆرى دا داخۆیانیێن دژوار بوون ههڤبهرى ئێك، لێ سهربارى ههمى كێشهیان وهلاتیێن ههرێما كوردستانێ ل ناوچهیێن جودا، شهڤا سهرێ سالێ ب ئاههنگێن پیشهوازیكرنێ ل سالا نوى دهربازكرن.
سالا نوى ل ههرێما كوردستانێ ب هێرشهكا فرۆكهیێن بێفرۆكهڤان ل پارێزگهها سلێمانیێ دهسپپێكر، ههڤدهم قهیران و كێشهیێن سالا بۆرى ژى بهردهوامن. وهلاتیێن ههرێمێ ژى دبێژین ئهو ژ كێشه و قهیرانا بێزاربووینه و دخوازن كشهیێن ههرێمێ ب تابهتى كێشهیێن موچهى، كێشهیا كارهبێ، بێكارى، باج و رسوماتێن زێده بهێنه چارهكرن ههرهوسا ناكۆكیێنسیاسى دناڤبهرا پارتى و ئێكهتیێ دا ب دویماهى بهێن و ئالیێن ههرێمێ پێكڤه كار بكهن بۆ راوهستاندنا هێرشێن لسهر ههرێمێ و بهرسینگگرتنا هێرش و گڤاشتنان.