واللـه مه ژى پڕۆژە دڤێن بەس ئەرزاق و مووچە پتر
بەلاڤ بکە
لوقمان ئاسیهى
بەرى هەیامەکێ کابرایەکێ سوحبەتا خوە و بابێ خوە بۆ مە کر، گۆت: ل سالێن (نۆتان) ژ چەرخێ دەربازبووى، دەستێ بابێ من و یێ پتریا خەلکى تەنگبوو، هینگێ، ئەز زارۆیەکێ چار پێنچ سالى بووم و هند مەرەقا من کەتبوو پایسکلەکێ ب خوە من د خەونێ دە ژى ئەو پایسکل د دیت، لێ چەند من و دایکا من ئەو سوحبەت ل دەف بابێ من ڤەدکر، دا بێژت: سەرچاڤا بابۆ، بەس هەتا یێن باش و (لاۆ) بێنە سویکێ. کەیفا من ژى دهات و ئەز زوى قانع دبووم و دچووم، هەتا کو ئەز مەزن بوویم، من ژ نوى زانى کو هینگێ ئەو پارەیێن بابێ من ژ هرڤە و وێڤە پەیدادکرن ب زۆرى تێرا خوارن و هندەک جلک و ملکێن (باڵا) یێن بێ سەروبەر دکرن و ب ئەوێ رەنگە (ئیدارێ)، بابێ مە، مەزنێ مالا مە، وەکى گولەکێ ئەم ژ ئەوێ تەنگاسیێ دەربازکرن.
نهو ئەز دێ ئەڤێ پرسیارێ کم: گەلۆ جارێ وەکى حەقێ پچەک ئەرزاقى د بەرویکا تە دە نەبت، وەکى تو قەردارێ مارکێتێ و خودانێ فێقی و خودانێ گۆشتى و خودانێ دوکانا جلکا بى، وەکى ژ تڕسا پارەیێ دختور و دەرمان و تاقیگەهان گاڤ و سەعەت تو دوعا بکى و بێژى یا خودێ تو چو نەساخییێن مەزن نەدى من و زارۆیێن من و مە هەوجەى چو نشتەرگەریا نەکى و وەکى چاڤێ تە ل فەیسبۆکی بت کا گەنگى و پشتى چەند رۆژان و چاوا دێ لیستا (مووچە)ى ئێتە خوار، هوین و خودێ بۆ کەسەکێ هوسا (کو ب هزاران کەسێن وەکى وى هەنە)، پرۆژە و (ئینجازات) و فەستیڤالێن هنگڤین و هنار و تەحین و سینەمە و سێڤان و تاوەر چ گرنگییا خوە هەیە؟
ئەز دبێژم د رەوشەکا وەکى یا نهو دە، کو مووچە ب ئەڤى دەستوداریە، ما نە مەفرۆزە هندەک ژ بارێ خەلکێ بێتە سڤکرن؟
جارێ ئەز وەک وەلاتیەکێ ئاسایی، ما نە مافێ منە ئەز بێژم، پارەیێ ئەڤێ ژمارەیا مەزنا پڕۆژەیان ژ کیڤە دئێت، ما د رەوشەکا هوسا دە، ما گەر ئەو پارەیێن ل ئەڤان پڕۆژیان دئێتە مەزاختن ببتە مووچە بۆ چەند وزارەتەکان ما (مەعقولتر نینە)؟ ما د رەوشەکا هوسا دە کو پتریا بەرویکان ڤالا یان نیمچە ڤالانە، ما پارەیێ موەلیدەیان ل سەر خەلکێ بێتە سڤکرن دگەل یێن غاز و گاز و پانزینێ ما ( مەعقولتر نینە)؟ ئەز پشتڕاستم کو پتریا وان هێژایێن مە بڕێڤە دبن هایدارى (هەرەم ماسلۆ) نە، یێ پێدڤییێن ژیانێ، کو تێدە پێدڤیێن فسیۆلۆژى و یێن ئەمانەتێ ل پێشییا هەمى پێدڤییێن دی دئێن و ئەگەر هایدار نەبن، ئەز دبێژم سەد تاوەر و جادەیێن نوى گۆرى گوینیەکێ برنجى و ئێکێ ئارى و چەند بوتلەکێن زەیتێ و چەند سەد هزار دینارەکان ببن بۆ خێزانەکا کێم دەرامەت و نەیی.
