گاڤ

ناسا بەرهەڤییان دکەت مرۆڤان ب هنێریتە هەسارا سۆر و ژبۆ ڤێ یەکێ بنگەهەکێ ب هەمان ژینگەها مەریخێ چێکریە و ل خۆبەخشان دگەریت ل وی بنگەهی بژین.

ل گۆرەی پلانا ناسایێ، ل سالا 2025ێ دێ گەشتەک بۆ هەسارا مەریخێ هێتە هنارتن و ڤێ جارێ دێ مرۆڤ ل گەل وێ گەشتێ چنە وێ هەسارێ.

ناسایێ د بەیانەکێ دا راگەهاند؛ وان ل هیۆستن بنگەهەکێ هەمان ژینگەها مەریخێ چێکریە کو ب پرینتەرێ 3D هاتیە چێکرن و رۆبەرێ وێ 158 مەترێن دوجایە.

د ناڤ ڤی بنگەهی دا هەمان ئەو ژینگەهـ و ئاستەنگی هەنە یێن ل سەر مەریخێ هەیی و ناسایێ دڤێت، مرۆڤ بۆ دەمێ سالەکێ ل وی بنگەهی بژین و هەمان وان ئاستەنگیان ببینین یێن ل سەر مەریخێ هەیی یێن مینا، نەبووما ئۆکسجینێ، نزمیا پلەیا گەرمێ، نزمیا ئاستێ راکێشانێ، ژکارکەفتنا ئامیرەیان و گیروبوونا پەیوەندیان ب بنگەهێ سەرەکی.

ناسایێ دڤێت ئەو کەسێن خۆبەخش بۆ دەما سالەکێ ل وی بنگەهی بژین و هەمی زانیاریان دەربارەی ژیانا وان کۆمبکەن داکو هەمی زانیاری هەبن ل دەمێ گەشتا وان بۆ مەریخێ.

ناسایێ ئەڤ مەرجە بۆ خۆبەخشێن پێشکێش دکەن، داناینە:

• پێدڤیە وەلاتییێ ئەمریکا بیت یان ئاکنجیێ هەردەمی یێ وەلاتی بیت.
• ژیێ وان د ناڤبەرا 30 بۆ 55 سالیێ دابیت  و کێشەیێن ساخلەمییێ نەبن.
• زمانێ ئنگلیزی باش بزانن داکو ل دەمێ پەیوەدنیکرنێ ل گەل بنگەهێ سەرەکی و هەڤکارێن ل گەل چ کێشە چێنەبن.