كۆریا باشوور: كۆریا باكۆر نزیكى 7 هزار كونته‌ینه‌رێن چه‌كى داینه رۆسیا
بەلاڤ بکە
گاڤ
كۆریا باكۆر نزیكى 7 هزار كونته‌ینه‌رێن چه‌كى هه‌ر ژ تیرمه‌ها سالا بۆرى هه‌تا نوكه داینه رۆسیا دا كو د شه‌ڕێ ئۆكراینا دا بكاربینیت.
ل سێپته‌مبه‌را سالا بۆرى كیم جۆنگ ئون سه‌رۆكێ كۆریا باكۆر و ڤلادیمیر پۆتین سه‌رۆكێ رۆسیا ل رۆژهه‌لاتێ رۆسیا كۆمببوون، ئه‌مریكا پشتى هینگێ راگه‌هاند بوو كو بیۆنگ یانگ چه‌كى دده‌ته موسكۆیێ.
شین وون سیك وه‌زیرێ به‌رگریێ یێ كۆریا باشوور ئه‌ڤرۆ دوشه‌مبیێ راگه‌هاند "ژماره‌یا كونته‌ینه‌رێن چه‌كى ژ كۆریا باكۆر بۆ رۆسیا گه‌هشتیه نزیكى 7 هزاران"، وه‌كى فرانس پرێس به‌لاڤكرى.
ناڤهاتى ئاماژه ب وێ چه‌ندێ ژى كریه "ل گه‌ل داخستنا هنده‌ك رێكێن ده‌ریایى، هنده‌ك كونته‌ینه‌رێن چه‌كى ب رێكا هێلێن ئاسنى بۆ رۆسیا هاتینه هنارتن".
ل ناڤه‌راستا هه‌یڤا ئۆكتۆبه‌را سالا بۆرى ژى، ئه‌مریكا راگه‌هاند بوو كو كۆریا باكۆر پتر ژ هزار كونته‌ینه‌رێن چه‌ك و ته‌قه‌مه‌نییان داینه رۆسیا.
هه‌روه‌سا د چرییا دوێ یا سالا بۆرى دا، كۆریا باشوور جیرانا خۆ كۆریا باكۆر ب ڤرێكرنا چه‌كى بۆ رۆسیا تۆمه‌تباركربوو.
