خوارنه‌كا گرنگ بۆ خۆپاراستنێ ژ نه‌خۆشیێن دلى و بۆریێن خوینێ
بەلاڤ بکە
گاڤ
شاره‌زایه‌كێ خۆراكى ئاماژه دا ناڤێ خوارنه‌ك/ڤه‌خوارنه‌كێ كو رۆله‌كێ گرنگ د پاراستنا مرۆڤى ژ نه‌خۆشیێن دلى و بۆریێن خوینێ دا هه‌یه.
ل گۆره‌ى پرۆفیسۆر تیم سپێكتۆر شاره‌زایێ خۆراكى و مامۆستایێ زانستێ په‌ژیكێن بۆماوه‌یى ل زانكۆیا كینگز كولیج ل له‌نده‌ن و دامه‌زرێنه‌رێ ئه‌پلیكه‌یشنێ Zoe health؛ كاكاو د شیان دایه مفاى بگه‌هینیته دلى و به‌كتریایا رویڤیكان بهێزبكه‌ت و ته ژ مرنا به‌روه‌خت دویر بكه‌ت، هندى تو جۆرێ دروست بهه‌لبژێرى.
گۆت ژى "گه‌له‌ك مفایێن ساخله‌میێ د كاكاوێ دا هه‌نه و د راستى دا ئه‌و ژ گه‌له‌ك خوارنێن ساخله‌م ب مفاتره ده‌مێ بابه‌تێ گرێداى پێكهاته‌یێن وێ بیت".
كاكاو یا پڕه ژ پۆلیفینۆلێ و پۆلیفینۆل ژێده‌ره‌كێ سه‌ره‌كى یه بۆ فایبه‌ران، ئه‌و پۆلیفینۆلا د كاكاوێ دا هه‌ى پتره ژ یا د تویشه‌مبییان و هناران دا.
مادده‌یا پولیفینۆل به‌كتریایا رویڤیكان یا ب مفا ب هێز دكه‌ت و ئه‌و به‌كتریایا دبیته ئه‌گه‌رێ نه‌خۆشییان یان به‌كتریایا زیانبه‌خش كێم دكه‌ت.
زێده‌بارى هه‌بوونا رێژه‌یێن باش ژ پۆلیفینۆلێ و فایبه‌ران د كاكاوێ دا، كاكاو هه‌روه‌سا د شیان دایه ته‌مه‌نێ مرۆڤى درێژ بكه‌ت.
پرۆفیسۆر سپێكتۆر ل دۆر ڤێ چه‌ندێ دبێژیت "د لێكۆلینه‌كا ڤێ دویماهیێ دا ل سه‌ر 20 هزار كه‌سان كو كاكاو ب وان هاتیه دان و بۆ ده‌مێ 3 سال و نیڤان دویڤچوونا وان هاتیه كرن، دیار بوویه كو ئه‌و كه‌سێن كاكاو خوارین ب رێژه‌یا 27% رێژه‌یا مرنا وان ژ به‌ر نه‌خۆشیێن دلى كێمتر بوو ب هه‌ڤبه‌ركرن ل گه‌ل وان كه‌سێن كاكاو نه‌خوارین".
