گاڤ

كۆمپانیا هیۆنداى ل كۆریا باشوور و كۆمپانیا كیا یا گرێداى وێ پلان دانایه‌ ب هێز بهێنه‌ دناڤ هه‌ڤڕكییا دروستكرنا ترۆمبێلێن كاره‌بێ دا و پلان دانایه‌ پتر ژ 50 ملیار دۆلاران هه‌تا سالا 2026 ژ بۆ پێشڤه‌برن و به‌رهه‌مئینانا ترۆمبێلێن كاره‌بێ ته‌رخانبكه‌ت.

هیۆنداى هه‌روه‌سا كۆمپانیا كیا یا گرێداى وێ ل رێزا سیێ د لیستا پڕفرۆشترین ترۆمبێلان دا ل جیهانێ دهێت، لێ د بوارێ دروستكرنا ترۆمبێلێن كاره‌بێ دا تا نوكه‌ نه‌شیایه‌ هه‌ڤڕكییا كۆمپانیا BYD یا چینى بكه‌ت.

كۆمپانیا هیۆنداى ئه‌وا بزاڤان دكه‌ت بگه‌هیته‌ ئێك ژ سێ رێزێن ده‌ستپێكێ ل سه‌ر ئاستێ جیهانێ بۆ دروستكرنا ترۆمبێلێن كاره‌بێ، به‌رى نوكه‌ پلانا خۆ یا زێده‌كرنا به‌رهه‌مئینانا سالانه‌ بۆ ترۆمبێلێن كاره‌بێ بۆ پتر ژ 3.6 ملیۆن ترۆمبێلان ل گه‌ل هاتنا سالا 2026 راگه‌هاند بوو هه‌روه‌سا وه‌به‌رهێنانا نوى یا 50.5 ملیار دۆلاران ژ بۆ پێشڤه‌برنا ترۆمبێلان راگه‌هاندیه‌.

ل گۆره‌ى پلانا نوى، هیۆنداى دێ 80 هزار ده‌لیڤه‌یێن كارى ل كۆریا باشوور په‌یداكه‌ت و دێ سێ كارگه‌هێن نوى یێن دروستكرنا ترۆمبێلێن كاره‌بێ ئاڤاكه‌ت.

دهێته‌ چاڤه‌رێكرن ل گه‌ل بجهئینانا پلانا هیۆنداى، به‌رهه‌مئینانا ترۆمبێلێن كاره‌بێ ل كۆریا باشوور زێده‌ ببیت و بگه‌هیته‌ 1.51 ملیۆن ترۆمبێلان ل گه‌ل هاتنا سالا 2030.

ستراتیژییا به‌رهه‌مئینانا ترۆمبێلێن كاره‌بێ یا گرۆپێ كۆمپانیێن هیۆنداى، وه‌به‌رهێنانان د ژێرخانه‌یا ئابوورى، سوفتوه‌یران و ته‌كنولۆژیایا پاترییان ژى دا ب خۆڤه‌ دگریت.