لێكۆلینه‌ك كارتێكرنا نه‌خۆشییا شه‌كرێ ژ جۆرێ دوێ ل سه‌ر مێشكى ئاشكرا دكه‌ت
بەلاڤ بکە
گاڤ
لێكۆلینه‌كا ساخله‌میێ یا نوى ئاماژه ب كارتێكرنا نه‌خۆشییا شه‌كرێ ژ جۆرێ دوێ ل سه‌ر مێشكى كریه.
لێكۆلینه‌كا نوى یا كولیژا پزیشكى ل زانكۆیا واشنتۆن دیاركریه "ره‌نگه نه‌خۆشییا شه‌كرێ ژ جۆرێ دوێ ببیته ئه‌گه‌رێ بناڤسالڤه‌چوونا خانه‌یێن مێشكى ب شێوه‌یه‌كێ ب له‌زتر ژ وێ چه‌ندا ب ره‌نگه‌كێ ئاسایى رویدده‌ت و ئه‌ڤ چه‌نده دبیته ئه‌گه‌رێ تێكچوونه‌كا مه‌عریفى یا زوى و زێده‌بوونا مه‌ترسییا توشبوونێ ب نه‌خۆشییا ژبیركرنێ".
دیار ژى كریه "ب ڤێ چه‌ندێ كارتێكرنا نه‌خۆشییا شه‌كرێ دویرتر دچیت ژ ئاستێن شه‌كرێ د خوینێ دا و به‌رهنگارییا ئه‌نسۆلینێ و ره‌نگه كارتێكرنه‌كا ب له‌ز ل سه‌ر مێشكى ژى هه‌بیت".
لێكۆله‌ران ئاماژه ب وێ چه‌ندێ كرینه "لێكۆلینان تێگه‌هشتنه‌كا پتر ل دۆر چه‌وانییا كارتێكرنا نه‌خۆشییا شه‌كرێ ل سه‌ر بناڤسالڤه‌چوونا مێشكى داینه مه، لێكۆلینا د كۆڤارا زانستێ ده‌ماران ژى دا دیاركریه كو كه‌سێن تووشبوویێن نه‌خۆشییا شه‌كرێ ژ جۆرێ دوێ نیشانێن بله‌زبوونا بناڤسالڤه‌چوونا مێشكى ل ده‌ف وان هاتینه دیتن ژ وان ژى كێمبوونا قه‌باره‌یێ مێشكى و لاوازییا ئه‌ركێن مه‌عریفى و ئه‌ڤ كارتێكرنه ل ده‌ف وان كه‌سێن بۆ ده‌مه‌كێ درێژه تووشى نه‌خۆشییا شه‌كرێ بووین پتر دیاربوویه".
د لێكۆلینێ دا ئاشكرا بوویه "قه‌باره‌یێ مێشكێ كه‌سێن تووشى نه‌خۆشییا شه‌كرێ بووین ل جهێن به‌رپرسیار ژ بیردانكێ و ئه‌ركێن بجهئینانێ د مێشكى دا ب هه‌ڤبه‌ركرن ل گه‌ل كه‌سێن دى بچویكتر بوو".
